14 ފެބްރުއަރީ 2025

Advertisement

ބައްޝާރު ހައްޔަރު ކުރަން ފްރާންސްއިން ޢަމުރެއް ނެރެފި

22 ޖެނުއަރީ 2025

 ސޫރިޔާގެ ކުރީގެ ރައީސް ބައްޝާރު އަލް-އަސަދު ހައްޔަރު ކުރުމަށް ފްރާންސްގެ ކޯޓަކުން ޢަމުރެއް ނެރެފިއެވެ.

ފްރާންސުން އެ ޢަމުުރު ނެރެފައިވަނީ 2017ވަނަ އަހަރުގެ ޖޫން މަހުގެ 7ވަނަ ދުވަހު ސޫރިޔާގައި ދިން ބޮމުގެ ޙަމަލާއެއްގައި ފަރަންސޭސިވިލާތާއި ސޫރިޔާއަށް ނިޞްބަތްވާ ޞަލާހު އަބޫ ނަބޫރު ޝަހީދުވުމާ ގުޅޭ ތަހުޤީޤެއްގެ ތެރެއިންނެވެ. ޤަސްތުގައި ޢާންމުންނަށް ޙަމަލާދީ ހަނގުރާމައިގެ ޖަރީމާތަައް އަސަދު ހިންގަވާފައިވާ ކަމަށް ތުހުމަތު ކުރެވޭ ކަމަށް އެ ޢަމުރުގައި ބުނެފައި ވެއެވެ.

މިއީ އަސަދު ހައްޔަރު ކުރުމަށް ފްރާންސްގެ ކޯޓަކުން ނެރެފައިވާ މި ފަދަ ދެވަނަ ޢަމުރެވެ. 2023ވަނަ އަހަރުގެ ނޮވެމްބަރު މަހުގެ ތެރޭގައި ވެސް އެ ފަދަ ޢަމުރެއް ފްރާންސްގެ ކޯޓަކުން ނެރެފައިވެއެވެ. އެއީ 2013ވަނަ އަހަރުގެ އޮގަސްޓު މަހުގެ ތެރޭގައި ސޫރިޔާގެ ދޫމާ އާއި އިރުމަތީ ޣޫޠާއަށް ދިން ޙަމަލާ ތަކެއްގައި ކެމިކަލް ހަތިޔާރު ބޭނުން ކޮށްފައިވާ ކަމުގެ ތުހުމަތުގައެވެ. އެ ޢަމުރުގައި ވެސް ބުނީ އިންސާނިއްޔަތާ ޚިލާފު ޢަމަލުތަކެއް ހިންގުމުގައި ބައިވެރިވެ ހަނގުރާމައިގެ ޖަރީމާތައް ހިންގުމުގައި އަސަދުގެ އަތެއް ވާ ކަމަށެވެ. ނަމަވެސް 2011ވަނަ އަހަރު ފެށި ސޫރިޔާގެ އަހުލީ ހަނގުރާމައިގައި އެއްވެސް ކެމިކަލް ހަތިޔާރެއް ބޭނުން ކޮށްފައި ނުވާނެ ކަމަށް އަސަދުގެ ސަރުކާރުން ދިޔައީ ބުނަމުންނެވެ.  

Advertisement

Advertisement

ކޮމެންޓް