ސްޕެއިންގެ ތާރީހުގައި ވެސް އުފެދުނު އެންމެ މޮޅު އެއް ފުޓްބޯޅަ ކުޅުންތެރިޔާގެ ގޮތުގައި ބެލެވޭ ލުއިސް ސުއަރޭޒް މިރަމޮންޓޭސް އުމުރުން 88 އަހަރުގައި މަރުވެއްޖެއެވެ.

ބާސެލޯނާ އަދި އިންޓަ މިލާންގެ ކުރީގެ މިޑްފީލްޑަރަކީ 1960 ވަނަ އަހަރު ބެލޮންޑިއޯ ހޯދި ސްޕެއިންއަށް އުފަން ފުރަތަމަ ކުޅުންތެރިޔާއެވެ.

ސްޕެއިންގެ ކުޅުން ތެރިއަކަށް މި އެވޯޑް ލިބުނު ހަމައެކަނި ފިރިހެނަކީ އޭނާ – އޭގެ ފަހުން އެލެކްސިއާ ޕުޓެލާސް ވަނީ 2021 އާއި 2022 ވަނަ އަހަރު ދެ ފަހަރެއްގެ މަތިން ބެލޮންޑިއޯ ފެމިނިން (އަންހެން) އެވޯޑް ހޯދާފައެވެ.

އާދީއްތަ ދުވަހު ބާސެލޯނާ އިން ނެރުނު ބަޔާނެއްގައި ވަނީ ސުއަރޭޒް މަރުވެފައިވަނީ އިޓަލީގެ މިލާންގައިކަން ކަށަވަރުކޮށްދީފައެވެ. މަރުވި ސަބަބެއް ހާމައެއް ނުކުރެއެވެ.

ލޯބިން "ލޫއިސިޓޯ" ގެ ނަމުން މަޝްހޫރު އޭނާ އަކީ ސްޕެއިންގެ ފުޓްބޯޅައިގެ ތާރީހުގައި ވެސް އެންމެ މޮޅު އެއް ކުޅުންތެރިޔާގެ އިތުރުން 1950 ގެ އަހަރުތަކުގެ ދެވަނަ ހާފުގައި ބާސާގެ މުހިއްމު ބައެއްގެ ގޮތުގައި އެންމެން ވެސް ދެކޭ ކުޅުންތެރިއެއް، ބާސެލޯނާގެ ބަޔާނުގައިވެއެވެ.

ޕުޓެލާސް ސުއަރޭޒްއާ ބައްދަލުވި ގޮތާއި އޭނާ ޓްވިޓާގައި އިންސްޕަޔަރ ކުރި ގޮތް ހަނދާންކޮށްދީ ބުނީ، “[ޔޫ’އަރ] ޕާޓް އޮފް ހީސްޓްރީ އިން ފުޓްބޯޅަ. އަޅުގަނޑު އަބަދުވެސް ހަނދާން ހުންނާނެ ފުރަތަމަ ބެލޮންޑިއޯ ހޯދުމަށްފަހު އަޅުގަނޑަށް ކިޔައިދެއްވި އެއްޗަކާއި، އެކަމުން އަޅުގަނޑަށް އިންސްޕަޔަރ ކުރި ގޮތް. ސުލްހަވެރިކަމާއެކު އަރާމުކޮށްލައްވާ ޑޮން ލުއިސް ސުއަރޭޒް.”

ސުއަރޭޒް ބާސެލޯނާއާ ގުޅުނީ 1954 ވަނަ އަހަރު ޑިޕޯޓިވޯ ލަ ކޮރޫނާ އިންނެވެ.

އޭނާ ވަނީ ބާސެލޯނާއަށް 253 ފަހަރު ކުޅެ 141 ގޯލް ޖަހައި ލަލީގާގެ ތަށި ދެފަހަރު އަދި ސްޕެނިޝް ކަޕް ދެފަހަރު ކާމިޔާބުކޮށްދީފައެވެ.

1961 ވަނަ އަހަރު އޭނާ އިންޓަ މިލާނަށް ގުޅުމަށްފަހު ތިން ސެރީއޭ ތަށި އަދި ދެ ޔޫރަޕިއަން ކަޕް ވަނީ ކާމިޔާބުކޮށްފައެވެ.

“މިއީ އިންޓަގެ ހުރިހާ ސަޕޯޓަރުންނަށް ވަރަށް ހިތާމަވެރި ދުވަހެއް؛ އޭނާއަކީ ހަގީގަތުގައިވެސް އާދަޔާ ހިލާފު މީހެކެވެ. އަހަރެމެން އެކުގައި ފުޓްބޯޅައާ ބެހޭ ގޮތުން ވާހަކަ ދެއްކިއިރު އޭނާއަކީ ވަރަށް ސީދާ އަދި ޢިލްމުވެރި ކުޅުންތެރިއެއް” އިންޓަ މިލާންގެ ނައިބު ރައީސް ހާވިއާ ޒަނެޓީ ނެރުނު ބަޔާނެއްގައި ބުންޏެވެ.

ކްލަބް ކެރިއަރުގެ އިތުރުން ސުއަރޭޒް އަކީ 1964 ވަނަ އަހަރު ޔޫރަޕިއަން ޗެމްޕިއަންޝިޕް ކާމިޔާބުކުރި ސްޕެއިންގެ ޤައުމީ ޓީމުގެ ވެސް ކުޅުންތެރިއެކެވެ.

ކުޅުން ހުއްޓާލުމަށްފަހު ސުއަރޭޒް ވަނީ އިންޓަ މިލާނާއި ޑިޕޯޓިވޯ ފަދަ ގިނަ ކްލަބްތަކެއް މެނޭޖްކޮށްދީފައެވެ. އޭނާ ވަނީ ސްޕެއިންގެ ގައުމީ ޓީމު ވެސް މެނޭޖްކޮށް، 1990 ވަނަ އަހަރުގެ ވޯލްޑް ކަޕްގެ ފަހު 16 އަށް ޓީމް ގެންގޮސްދީފައެވެ.