އެމްއެންޑީއެފް ސަދަން އޭރިއާ ކޮމާންޑާއި، ފުވައްމުލަކު ސިޓީ ކައުންސިލް ގުޅިގެން ފުވައްމުލަކުގައި "ކޮމިއުނިޓީ ވޮލަންޓިއަރ ފަޔަރ ފައިޓަރ" ޓްރެއިނިންގ ޕްރޮގްރާމެއް ފަށައިފިއެވެ.

ފެބުރުވަރީ 24 އިން ފެށިގެން ފަސް ދުވަހުގެ މުއްދަތަށް، ފުވައްމުލަކު ސިޓީގައި ކުރިއަށްގެންދާ މި ޕްރޮގްރާމްގައި 17 ފަރާތަކުން ބައިވެރިވެފައިވެއެވެ.

މި ޕްރޮގްރާމަކީ ރަށު ފެންވަރުގައި ކޮމިއުނިޓީ ވޮލަންޓިއަރ ފަޔަރ ފައިޓަރުން އުފައްދައި، ރަށްރަށުގައި ފަޔަރ ފައިޓަރުން އިތުރުކުރުމުގެ މަޤްޞަދުގައި ކުރިއަށްގެންދާ ޕްރޮގްރާމެކެވެ.

Advertisement

މިގޮތުން، ހިނގާފާނެ އަލިފާނުގެ ހާދިސާތަކުގައި އަވަހަށް އިޖާބަދީ، ހަރަކާތްތެރިވުމުގައި އެ މުޖުތަމަޢުގެ ބައިވެރިވުން އިތުރުކުރުމާއި، މީހުންގެ ފުރާނައާއި މުދާ ރައްކާތެރިކުރުމުގައި ޕްރޮފެޝަނަލް ފަޔަރ ފައިޓަރުންނާއި، ކުއްލި ހާލަތުގައި ރައްދުދޭ ފަރާތްތަކުގެ މަސައްކަތްތަކަށް އެހީތެރިވެދޭ، ތަމްރީނު ލިބިފައިވާ ވޮލަންޓިއަރުންގެ ދައުރު ފުޅާކުރުމަކީ ވެސް މި ޕްރޮގްރާމްގެ މަޤުޞަދުތަކުގެ ތެރޭގައި ހިމެނޭ ކަމެކެވެ.

މި ޕްރޮގްރާމްގައި އަލިފާން ރޯވާން ދިމާވާ ސަބަބުތަކާއި އަލިފާން ނިއްވާނޭ ގޮތްތަކާއި އަލިފާން ނިއްވުމަށް ބޭނުންކުރާ ބައެއް އާލާތްތަކާ ބެހޭގޮތުން މަޢުލޫމާތު ދީ އެ ތަކެތި ޢަމަލީގޮތުން ބޭނުންކުރާނޭ ގޮތްތައް ބައިވެރިންނަށް ދަސްކޮށްދެވޭނެއެވެ.

މި ޕްރޮގްރާމުގައި މުދައްރިބުންގެ ގޮތުގައި ހަރަކާތްތެރިވަނީ އެމްއެންޑީއެފް ސަދަން އޭރިއާ ކޮމާންޑް، ފުވައްމުލަކު ފަޔަރ ސްޓޭޝަނުގެ ފަޔަރ ފައިޓަރުންނެވެ.