ކޮރަޕްޝަން ހުއްޓުވުމަށް ގުޅިގެން މަސައްކަތް ކުރުމަށް އިސްލާމިކް މިނިސްޓްރީ އާ އޭސީސީ އެއްބަސްވެއްޖެއެވެ.

މިއީ ކޮރަަޕްޝަނަށް މަގުފަހިވާ ކަންކަން ވިޔަ ނުދިނުމަށް ކުރެވޭނެ މަސައްކަތްތައް ދެނެގަނެ، އެ މަޤްސަދް ހާސިލްކުރުމަށް ކުރެވޭނެ މަސައްކަތްތައް ކަނޑައެޅުމަށް އެ ދެ މުވައްސަސާ އިން ވި އެއްބަސްވުމެކެވެ.

މި ފަހުމުނާމާގެ ސަބަބުން ކޮރަޕްޝަން ވިޔަ ނުދިނުމަށް އަޅަންޖެހޭ ފިޔަވަޅުގަކުގެ މައްޗަށް އެންޓި ކޮރަޕްޝަން ކޮމިޝަނުންދޭ ލަފަޔާއި އިރުޝާދު ތަންފީޒުކުރުމަށް ދެފަރާތުން ގުޅިގެން ކުރާނެ މަސައްކަތްތައް ކަނޑައެޅިގެން ދާނެއެވެ.

Advertisement

މިނިސްޓަރު ޝަހީމް ވިދާޅުވީ އޭސީސީ އާ އެކު މިފަދަ ފަހުމުނާމާއެއް އެކުލަވައިލުމުގެ މަގްސަދަކީ ކޮރަޕްޝަން ހުއްޓުވަން އޭސީސީއާއި މިނިސްޓްރީ ގުޅިގެން ކުރެވޭނެ މަސައްކަތްތައް ދެނެގަނެ، އެ މަގުސަދު ހާސިލުކުރެވޭނެ ގޮތެއްގެ މަތިން ކުރާނެ މަސައްކަތްތައް ކަނޑައެޅުން ކަމަށެވެ.

ފަހުމުނާމާގެ ދަށުން އެ މިނިސްޓްރީން މަސައްކަތްކުރާނީ ވަރަށް އިޚުލާސްތެރިކަމާއެކު ކަމަށް ވެސް މިނިސްޓަރ ވިދާޅުވިއެވެ.

މި ފަހުމުނާމާގައި މިވުޒާރާގެ ފަރާތުން ސޮއިކުރެއްވީ އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުއެވެ. އެންޓި ކޮރަޕްޝަން ކޮމިޝަންގެ ފަރާތުން ސޮއިކުރެއްވީ އެ ކޮމިޝަންގެ ރައީސް އަލްއުސްތާޛު އާދަމް ޝާމިލް އެވެ.