ޔޫކްރޭންގެ އަސްކަރިއްޔާއިން ވަނީ އެގައުމުގެ އިރުމަތީ ސަރަހައްދުގެ އިތުރު ދެ އަވަށަކުން ސިފައިން އަނބުރާ ގެންގޮސްފައިވާކަން އިއުލާންކޮށްފަ އެވެ.

ޔޫކްރޭންގެ މީޑިއާތަކާއި އެހެން މަސްދަރުތަކުން ކިއެވްގެ އަސްކަރީ ތަރުޖަމާނާ ހަވާލާދީ އަންގާރަ ދުވަހު ބުނެފައިވަނީ އިރުމަތީ ޑޮނެޓްސްކް ސަރަހައްދުގެ މުހިއްމު ސިޓީ އަވްޑިވްކާ ކައިރީގައި އޮންނަ ސްޓެޕޯވޭ އާއި ސެވަރނޭ އަވަށްތަކުން ސިފައިން ފައިބާގެން ގޮސްފައިވާ ކަމަށެވެ.

ހަމަ އެދުވަހު ރަޝިޔާގެ ޑިފެންސް މިނިސްޓަރު ސަރްގޭ ޝޮއިގޫ ބައްދަލުވުމެއްގައި ވިދާޅުވީ ސެވަރނޭ ހިމެނޭ ގޮތަށް ފާއިތުވި ހަފްތާއެއްހާ ދުވަހުގެ ތެރޭގައި ކޮންޓްރޯލް ނަގާފައިވާ ކަމަށެވެ.

Advertisement

ރަޝިޔާގެ އަސްކަރިއްޔާއިން ވަނީ އަވްދީވްކާގެ ކޮންޓްރޯލް ނަގާފައިވާކަން ފެބްރުއަރީ މަހުގެ 17 ވަނަ ދުވަހު އިއުލާންކޮށްފަ އެވެ.

އަދި އަންގާރަ ދުވަހު ވެސް ޔޫކްރޭންގެ ރައީސް ވޮލޮޑިމިއާ ޒެލެންސްކީ ވަނީ ސައުދީ އަރަބިއްޔާއަށް ވަޑައިގެން ވަލީއަހުދު މުހައްމަދު ބިން ސަލްމާނާ ބައްދަލުކުރައްވާފަ އެވެ.

މި ބައްދަލުވުމުގެ ކުރިން ޒެލެންސްކީ ސޯޝަލް މީޑިއާގައި ވިދާޅުވެފައި ވަނީ ޔޫކްރޭނުން ޕީސް ފޯމިއުލާގެ ނަމުން ނަންދެވިފައިވާ ސުލްހައިގެ ޕްލޭނާ ބެހޭ ގޮތުން މަޝްވަރާ ކުރާނެ ކަމަށެވެ.

ޔޫކްރޭނުން ދަނީ ބައިނަލްއަގްވާމީ މުޖުތަމައު ސަމިޓް ފެންވަރުގެ ބައްދަލުވުމެއް ބޭއްވުމަށް ބާރުއަޅަމުންނެވެ.