އެއާ އެމްބިއުލާންސްގެ ހިދުމަތް މިއަދު ފަށައިފިއެވެ.

މިއީ ރާއްޖޭގައި މުޅިން އަލަށް ފެށި ހިދުމަތެކެވެ.

މި ހިދުމަތް ފެށީ އެކަމަށް ހާއްސަކޮށްގެން ބަދަލުތަކެއް ގެނައި މޯލްޑިވިއަންގެ ޑޭޝް-8 ގެ ބޯޓަކާއޮ ސީ ޕްލޭނެއްގައެވެ.

Advertisement

އެއާ އެމްބިއުލާންސްގެ ހިދުމަތް ފެށުމާ ގުޅިގެން ހެލްތު މިނިސްޓްރީން ނެރުނު ބަޔާނެއްގައި ބުނީ މިއަދުން ފެށިގެން ދޭން ދެ ބޯޓުގައި މެޑިކަލް އިމަޖެންސީ ހާލަތްތަކުގައި ރާއްޖޭގެ އެކި ކަންކޮޅުތަކުން ފަރުވާ ލިބެން ހުރި އެންމެ ކައިރީ ޓާޝަރީ ހޮސްޕިޓަލުތަކަށް ބަލި މީހުން އުފުލާނެ ކަމަށެވެ.

އެ ބޯޓުގައި އަވަސް ސިއްހީ ފަރުވާ ދެވޭ ގޮތަށް ވަސީލަތްތަކާއެކު ތަމްރީން ކޮށްފައިވާ 15 ސިއްހީ ހިދުމަތްތެރި އަކު ވެސް އުޅޭނެ ކަމަށް ބުންޏެވެ. އެއީ ފަސް ޑޮކްޓަރަކާއި ފަސް ނަރުހުންގެ އިތުރުން އެމެޖެންސީ މެޑިކަލް ޓެކްނީޝަނުންނެވެ.

މިނިސްޓްރީން ބުނީ އެއާ އެމްބިއުލާންސާ އެކީ ރާއްޖޭގެ ހުރިހާ ހިސާބަކަށް 24 ގަޑިއިރު އެ ހިދުމަތް ލިބޭނެކަމަށެވެ.

އަވައްޓެރި ސްރީލަންކާ އަށް ބަލި މީހުން ގެންދިއުމުގެ ހުއްދަ ވެސް ލިބިފައިވާ ކަމަށާއި ވަރަށް އަވަހަށް އިންޑިއާ އިން ވެސް ލިބޭނެ ކަމަށް މިނިސްޓްރީން ބުނެފައެވެ.

އެއާ އެމްބިއުލާންސްގެ ހިދުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.