އެމެރިކާ އާއި ދެކުނު ކޮރެއާ ގުޅިގެން ގަވާއިދުން ކުރިޔަށް ގެންދާ ޖޮއިންޓް މިލިޓަރީ އެކްސަސައިޒް ފަށައިފި އެވެ.

"ދަ ފްރީޑަމް ޝީލްޑް" ގެ ނަމުން މަޝްހޫރު މި ތަމްރީނު ދެކުނު ކޮރެއާގައި ހޯމަ ދުވަހު ފެށިއިރު، މާޗް 14 ވަނަ ދުވަހުގެ ނިޔަލަށް މި އެކްސަސައިޒް ކުރިއަށް ގެންދާނެ އެވެ.

މި އެކްސަސައިޒް 48 ފީލްޑް ޓްރެއިނިން ޑްރިލް ކުރިއަށް ގެންދިއުމަށް ހަމަޖެހިފައިވާއިރު، މިއީ މިދިޔަ އަހަރު ކުރިއަށް ގެންދިޔަ ޑްރިލްތަކުގެ ގާތްގަނޑަކަށް ދެގުނަ އެވެ.

Advertisement

އޭގެ ތެރޭގައި ބޮން ގޮއްވުމާއި، ލައިވް ފައިރ ޝޫޓް ކުރުމާއި، ކްރޫޒް މިސައިލްތައް ހުއްޓުވުން ހިމެނެއެވެ. ދެގައުމުން ބުނާ ގޮތުގައި މި ޑްރިލްތައް ފަރުމާކޮށްފައި ވަނީ އުތުރު ކޮރެއާގެ ނިއުކްލިއާ ނުރައްކަލަކާ ކުރިމަތިލުމަށެވެ.

ދެކުނު ކޮރެއާގެ ޔޮންހަޕް ނިއުސް އެޖެންސީން ރިޕޯޓްކުރާ ގޮތުގައި މިޑްރިލްތަކުގައި ބޭނުންކުރުމަށް އެމެރިކާގެ އަސްކަރިއްޔާއިން ނިއުކްލިއާ ހަތިޔާރު އުފުލާ މަތިންދާބޯޓާއި ބޮން އަޅާ ބޯޓް ފަދަ ސްޓްރެޓެޖިކް ހަތިޔާރުތައް ގެންނާނެ ކަމަށެވެ. މިކަމާއި އުތުރު ކޮރެއާއިން ވަރަށް ބޮޑަށް ކަންބޮޑުވުން ފާޅުކޮށް ދެކޮޅު ހަދައެވެ.

އުތުރު ކޮރެއާގެ ލީޑަރު ކިމް ޖޮންގް އުން ފެބްރުއަރީ މަހު ދެއްވި ޚިޠާބުގައި ވިދާޅުވީ ހަނގުރާމައެއް ހިނގައިފިނަމަ ދެކުނު ކޮރެއާއަށް އެރުމަކީ ގައުމުގެ ސިޔާސަތެއް ކަމަށެވެ.

މީގެ އަހަރެއްހާ ދުވަސް ކުރިން ފްރީޑަމް ޝީލްޑް ތަމްރީނުގައި އުތުރު ކޮރެއާއިން ވަނީ އައިސީބީއެމް ކްލާހުގެ ހަވާސޮންގް-17 މިސައިލަކާއި ކުރު ރާސްތާގެ ބައެއް ބެލިސްޓިކް މިސައިލްތަކެއް ޓެސްޓްކޮށްފައެވެ.

އޮބްޒާވަރުން ބުނާ ގޮތުގައި މިއަހަރުގެ ޑްރިލްތަކަށް ރައްދުދީ އުތުރު ކޮރެއާ އިން ނިއުކްލިއާ ވޯހެޑް އުފުލުމަށް ފަރުމާކޮށްފައިވާ މިސައިލްތައް ޓެސްޓް ކޮށްފާނެ ކަމަށެވެ.