މިނިސްޓްރީ އޮފް ޔޫތު އެންޕަވާމަންޓް އިންފޮމޭޝަން އެންޑް އާރްޓްސް އިން ކުރިޔަށް ގެންދިޔަ މޯލްޑިވްސް ޔޫތު ހެކަތޯން އިން އެއްވަމަ "ފަންނުވެރިން"ގެ ޓީމު ހޯދައިފިއެވެ.

މި ހެކަތޯން ނިންމުމުގެ ގޮތުން ހާއްސަ ރަސްމިއްޔާތެއް ރޭ ބާއްވާފައިވާއިރު މި ހެކަތޯންއިން އެއްވަނަ އަށް ދިޔަ "ފަންނުވެރިން"ގެ ޓީމަށް 100،000 ރުފިޔާގެ ފައިސާގެ އިނާމު ވަނީ ދީފައެވެ. މި ޓީމަށް ފައިސާގެ އިނާމު ހަވާލުކޮށްދެއްވީ މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވަޒީރު ޑރ. މަރިޔަމް މާރިޔާ އެވެ.

މި ހެކަތޯންގެ ރަނަރަޕް ޓީމަކަށް ހޮވާފައިވަނީ "ހަފްލާ" އެވެ. އަދި ތިން ވަނަ ޓީމަކަށް ހޮވާފައިވަނީ "ޓީމު ބްރައިޓް މައިންޑްސް އެޑިއުކޭޝަން" އެވެ.

މި ހެކަތޯން ނިންމުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އިބްރާހިމް ވަހީދު ވިދާޅުވީ، ޒުވާނުންގެ ހުރި ހިޔާލުތައް ކުރިއަރުވާ އެކި މަޝްރޫއުތައް ކުރިއަށް ގެންދިޔުމުގައި ސަރުކާރުން އެހީތެރިވެދެއްވާނެ ކަމަށެވެ.

"ދިވެހި ޒުވާނުންނަށް، މިތަނުގައި ތިއްބެި ޒުވާން ކުދިންނަށް މަސައްކަތް ކޮށްލާފަ ލިބޭ ހުސްވަގުތުކޮޅުގައި މި ކުރާ ކަމުން އާމްދަނީއެއް ލިބޭތޯ ކެނޑިނޭޅި މަސައްކަތް ކުރަމުން މިދަނީ، ރަނގަޅު އެއްޗެއް، ކާމިޔާބު މަސައްކަތެއް ކުރެވޭތޯ، އެމަސައްކަތުގެ ކާމިޔާބުގެ ފޮނިކަން ތިބޭފުޅުންނަށް ލިބޭނެ، އަތުން ދޫކޮށް ނުލައްވާ" މިނިސްޓަރ ވިދާޅުވިއެވެ.

ޒުވާނުން ބޭނުންވާ މަސައްކަތް ކުރާނެ ތަނެއް ނެތްކަން ފާހަގަކުރައްވާ މިނިސްޓަރ ވިދާޅުވީ، ދިވެހި ޒުވާނުންނަށް މަސައްކަތް ކުރެވޭނެ އޮފީސް މާހައުލެއް ފަހިކޮށްދެއްވާނެ ކަމަށެވެ.

"ތި ބޭފުޅުން މަސައްކަތް ކުރާނެ ތަނެއް ނެތްކަން އަޅުގަނޑުވެސް ފާހަގަކުރަން، ގިނަ ކުދިންގެ އޮފީހަކީ ގޭގެ ކޮޓަރި، އެ ޕްރައިވަސީއެއް އެހެން ކުދިން ގޮވައިގެން އެކަން ކުރުމުގެ ފުރުސަތެއް ނެތް، އިދާރީ މަސައްކަތް މިކުރަނީ ސައިކަލު މަޑިދަށުގައި، އެއީ އޮފީހުގެ އެއް ބައި، އެކަން އިރާދަކުރެއްވިއްޔާ އަޅުގަނޑުމެން މި ވެރިކަމުގެ ތެރޭގައި ތިބޭފުޅުންނަށް ނިމުމަކަށް ގެނެސްދޭނަން، ދިވެހި ޒުވާނުންނަށް މަސައްކަތް ކުރެވޭނެ އޮފީސް މާހައުލެއް ފަހިކޮށްދޭނެނަން، ފުރުސަތު ހޯދައިދޭނަން" މިނިސްޓަރ ވިދާޅުވިއެވެ.

މި ހެކަތޯންގައި ޖުމްލަ 10 ޓީމެއް ބައިވެރިވެފައިވާއިރު މި ހެކަތޯން ކުރިއަށް ގެންގޮސްފައިވަނީ ދެ ދުވަހުގެ މުއްދަތަކަށެވެ. މި ހެކަތޯންގައި 3 ދާއިރާއަށް ޕިޗް ކުރުމަށް ހުޅުވާލިއެވެ. އެއީ މެންޓަލް ހެލްތާއި އިނޯވޭޓިވް މާކެޓްޕްލޭސް އަދި ކްރިއޭޓަރ އެކޮނޮމީއެވެ.

މި ހެކަތޯންގެ މެއިން ޕާޓްނަރަކީ އުރީދޫ މޯލްޑިވްސްއެވެ. އަދި ކޯ ޕާޓްނަރުންގެ ގޮތުގައި މާސްޓާކާޑް، މޯލްޑިލްވްސް އިސްލާމިކް ބޭންކް (އެމްއައިބީ) އަދި ރާއްޖެއޮންލައިން (އާރް.އޯ.އެލް) ހިމެނެއެވެ.

މޯލްޑިވްސް ޔޫތު ހެކަތޯންއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމުގެ ފުރަތަމަ 14 ހަފްތާގެ ތެރޭގައި ފެށުމަށް ނިންމާފައިވާ ހަރަކާތެކެވެ.