މިދިޔަ ސަރުކާރުން އުފެއްދި އިންތިޤާލީ އިންސާފުގެ އޮފީހުން ނިންމި މައްސަލަތަކުގެ ލިޔުންތައް ބެލެހެއްޓުމުގައި ވަރަށް ބޮޑަށް އިހުމާލުވެފައިވާކަމަށް ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.

ބަންޑާރަ ނައިބު އަޙްމަދު އުޝާމް ވިދާޅުވީ ކުރީ ސަރުކާރުން އުފެއްދި އިންތިޤާލީ އިންސާފުގެ އޮފީހަށް 489 މައްސަލަ ހުށައެޅިކަމަށާއި ސަރުކާރު ނިމުނުއިރު 460 މައްސަލައެއް ތަހުޤީގުކުރަން ނިންމާ 453 މައްސަލައެއް ބަލާ ނިންމާފައި އޮތްކަމަށެވެ. އަދި އޮފީހުން ބަލައި، މަދަނީ ބަދަލު ލިބެން ޖެހޭ ކަމަށް ނިންމާފައި އޮތް ޖުމްލަ 30 މައްސަލައެއް ހިމެނޭ ރިޕޯޓެއް މިދިޔަ އަހަރު ނޮވެމްބަރ މަހުގެ 17 ވަނަ ދުވަހު ރައީސް އޮފީހަށް ފޮނުވާފައިވާ ކަމަށެވެ.

އުޝާމް ވިދާޅުވީ އެފަދަ މައްސަލަތަކުގައި ކޯޓު މެދުވެރިކޮށް މަދަނީ ބަދަލު ހޯދައިދިނުމުގެ މަސައްކަތް ބަންޑާރަ ނައިބުގެ އޮފީހުން ކުރާގޮތަށް އޮތްނަމަވެސް ލިސްޓުގައި ހިމެނޭ މައްސަލަތަކުގެ ތެރެއިން ކޭސް ނަންބަރު ފިޔަވައި އިތުރު އެއްވެސް ލިޔެކިޔުމެއް އިންތިޤާލީ އޮފީހުން ބަންޑާރަ ނައިބުގެ އޮފީހަށް ހިއްސާކޮށްފައިނުވާކަމަށެވެ.

މި މައްސަލަތަކީ ގިނަ ބައެއްގެ ހައްގުތަކެއް ގެއްލިގެން ހުށަހަޅާފައިވާ ވަރަށް ސީރިއަސް މައްސަލަތަކެއްކަން ފާހަގަކުރައްވާ އުޝާމް ވިދާޅުވީ އިންތިޤާލީ އިންސާފުގެ އޮފީހުން ޤާނޫނާ އެއްގޮތަށް މަސައްކަތްކޮށްފައި ނުވާކަމަށާއި އެ އޮފީހުން އޮތީ ވަރަށް ބޮޑަށް އިހުމާލުވެފައިކަމަށެވެ.

"އެކަށީގެންވާ ގޮތެއްގައި މި އޮފީހުން ޤާނޫނާ އެއްގޮތަށް މަސައްކަތްތައް ކޮށްފައި ނުވާކަން އަޅުގަނޑު ހަމަ ފާހަގަކޮށްލަން ބޭނުންވޭ. ކޮންމެ ދުވަހަކު ކޮންމެ ދުވަހަކު އެތައް ބައިވަރު ބަޔަކު އެޓާނީ ޖެނެރަލްގެ އޮފީހަށް އައިސް އެޝަކުވާ އެބަ ކުރޭ. ނިމުނު ކަމަށް ބުނާ 30 މައްސަލައިގެ ލިޔުންތައް ހޯދުމުގެ މަސަައްކަތް އަދިވެސް ކުރިއަށްދަނީ އެގޮތުން އޭޖީ އޮފީހުން އެ މަސައްކަތަށް ވަކި ޓީމެއް ނަގައިގެން ބުރަކޮށް މަސައްކަތްކުރަމުން އެބަދަން." ބަންޑާރަ ނައިބު އަޙްމަދު އުޝާމް ވިދާޅުވިއެވެ.

އުޝާމް ވިދާޅުވީ މިދިޔަ ނޮވެމްބަރު މަހުގެ 17 ވަނަ ދުވަހު އިންތިޤާލީ އިންސާފުގެ އޮފީހުގެ މަސައްކަތް ނިމުމަކަށް އައުމުން ދައުލަތުގެ މުއައްސަސާތައް އުވިގެން ދިޔުމުން އަމަލުކުރާ އުސޫލުން އެ އޮފީހުގެ ހުރިހާ މުދާތަކާއި ލިޔުންތަކެއް ފިނޭންސް މިނިސްޓްރީއާ ހަވާލުކުރި ކަމަށެވެ. އަދި ނިމިފައިވާ 30 މައްސަލަ ހިމެނޭހެން ހުރިހާ މައްސަލަތަކުގެ ލިޔެކިޔުންތައް ހޯދުމަށްޓަކައި ބަންޑާރަ ނައިބުގެ އޮފީހުން ފިނޭންސް މިނިސްޓްރީގައި އެދުމުން އެ މިނިސްޓްރީން އިންތިޤާލީ އިންސާފުގެ އޮފީހުން ބޭނުންކުރަމުން ދިޔަ ސާވާ ހިއްސާކުރެއްވިކަމަށް އުޝާމް ވިދާޅުވިއެވެ.

އުޝާމް ވިދާޅުވީ، އެ ސާވާ ބެލި ބެލުމުން ފަރުވާތެރިކަމާއެކު ލިޔެކިޔުންތައް ބަހައްޓާފައި ނުވާކަމަށާއި އެކަމުގެ ސަބަބުން މަދަނީ ބަދަލު ލިބެންޖެހޭ ކަމަށް ނިންމާފައިވާ 30 މައްސަލައިގެ ލިޔެކިޔުން ހޯދުމަށް ވެސް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށެވެ.

އިންތިޤާލީ އިންސާފުގެ އޮފީހަކީ ރައީސް މުހައްމަދު އަމީންގެ ވެރިކަމުން ފެށިގެން ރައީސް ޔާމީންގެ ވެރިކަމާ ހަމައަށް ނިޒާމީ ގޮތެއްގައި ރޭވިގެން ދައުލަތުގެ އިދާރާއަކުން ނުވަތަ އެތަނުގެ ވެރިޔަކު މީހެއްގެ އިންސާނީ ހައްގަށް އަރައިގެންފައިވާނަމަ، އެ މައްސަލައެއް ބެލުމަށް 2020 ވަނަ އަހަރު އުފެއްދި އޮފީހެކެވެ.

މި އޮފީސް އެކުލަވާލާފައިވަނީ 2 އަހަރުދުވަހުގެ މުއްދަތަކަށެވެ. ނަމަވެސް އެ އޮފީހަށް ކަނޑައަޅާފައިވާ މުއްދަތުގެ ތެރޭގައި އެ އޮފީހުގެ މަސައްކަތް ނުނިމުމުން އެ އޮފީހުގެ މަސައްކަތް މިދިޔަ އަހަރުގެ ނޮވެމްބަރު 17 އާ ހަމައަށް އިތުރުކުރިއެވެ. އަދި އޭގެފަހުން އެ އޮފީސް ވަނީ އުވާލާފައެވެ.