11 ވަނަ މައިލޯ އެސޯސިއޭޝަން ޗެމްޕިއަންޝިޕްގެ މެންސް ކެޓަގަރީގެ ޗެމްޕިއަންކަން ދިވެހި ސިފައިންގެ ކުލަބް (ޑީއެސްސީ) އިން ހޯދައިފިއެވެ.

މާރިޗު 5 އިން 8 އަށް މާލޭގައި ކުރިއަށްދިޔަ މި މުބާރާތުގެ މެންސް ކެޓަގަރީގެ ޗެމްޕިއަންކަން ޑީއެސްސީން ހޯދާފައި ވަނީ ޖުމްލަ 182 ޕޮއިންޓް ހޯދައިގެންނެވެ.

މި މުބާރާތުގައި ޑީއެސްސީގެ އެތުލީޓުން ގިނަ ކާމިޔާބީތަކެއް ހާސިލުކުރިއިރު، އޯޕަން ބައިގެ އެންމެ މޮޅު ފިރިހެން އެތުލީޓަކަށް ހޮވިފައިވަނީ ވެސް ޑީއެސްސީގެ އެތުލީޓް އަދި ރާއްޖޭގެ އެންމެ ބާރު ދުވުންތެރިޔާ ސްޓާފް ސާޖަންޓް ޙަސަން ޝާއިދުއެވެ. މި މުބާރާތުގައި ސްޓާފް ސާޖަންޓް ޙަސަން ޝާއިދު ވަނީ، ތިން ރަން މެޑަލި ހާސިލުކޮށްފައެވެ. އެއީ، 100 މީޓަރު ދުވުމާއި، 200 މީޓަރު ދުވުމުގެ އިތުރުން، 400 މީޓަރު ދުވުމުންނެވެ. އަދި، އޭނާ ބައިވެރިވި ހަތަރެއް ގުނަ 100 މީޓަރު ދުވުމުން ވެސް ޑީއެސްސީ ޓީމު ވަނީ ރަން މެޑަލި ހާސިލުކޮށްފައެވެ.

Advertisement

ހަތަރެއް ގުނަ 100 މީޓަރު ދުވުމުގެ އިތުރުން، ޑީއެސްސީ ޓީމުން ވަނީ ހަތަރެއް ގުނަ 400 މީޓަރު އިވެންޓުން ވެސް ރަން މެޑަލި ހާސިލުކޮށްފައެވެ. ޑީއެސްސީގެ އެތުލީޓުން މުބާރާތުގައި ހާސިލުކުރި ކާމިޔާބީތަކަށް ބަލާއިރު، 800 މީޓަރު ދުވުމާއި، 1500 މީޓަރު ދުވުމުގެ އިތުރުން 5000 މީޓަރު ދުވުމުން ސާޖަންޓް ޙުސައިން ފަޒީލް ހާރޫން ވަނީ ރަން މެޑެލި ހާސިލުކޮށްފައެވެ. އަދި، މުބާރާތުގެ ޝޮޓްޕޮޓް އުކުމުންނާއި، ޑިސްކަސް ތުރޯއިން ޑީއެސްސީގެ އެތުލީޓް، ލާންސް ކޯޕްރަލް ޙަސަން ޝަމްއޫން ވަނީ ރަން މެޑެލި ހާސިލުކޮށްފައެވެ. އަދި ޖުވެލިންގ ތުރޯއިން، ޑީއެސްސީގެ އިތުލީޓް، ޕްރައިވެޓް ސުޒައިނު މުޙައްމަދު ރަން މެޑެލި ހާސިލުކޮށްފައިވެއެވެ.

މުބާރާތުގައި ޑީއެސްސީގެ އެތުލީޓުން ހާސިލުކުރި އިތުރު ކާމިޔާބީތަކުގެ ތެރޭގައި، 1500 މީޓަރު ދުވުމުން ޑީއެސްސީގެ އެތުލީޓް، ކޯޕްރަލް ޙުސައިން ރިޒާ ރިހި މެޑެލި ހާސިލުކުރިއިރު، ޑީއެސްސީގެ އެތުލީޓް، އިބްރާހީމް ނާހިލް ނިޒާރު ވަނީ 100 މީޓަރު ދުވުމާއި، 200 މީޓަރު ދުވުމުން ލޯ މެޑެލި ހާސިލުކޮށްފައެވެ. އަދި 400 މީޓަރު ދުވުމުން ޑީއެސްސީގެ އެތުލީޓް، ކޯޕްރަލް ޢަބްދުﷲ ރަޝީދު އިސްމާޢީލް ވެސް ވަނީ ލޯ މެޑަލި ހާސިލުކޮށްފައިވެއެވެ.

މުބާރާތުގައި ބައިވެރިވި ޑީއެސްސީގެ އެތުލީޓުންގެ ތެރެއިން، ލެފްޓިނެންޓް ކާނަލް ޔޫސުފް ނިޝާރު ވަނީ ޝޮޓްޕޮޓް އުކުމުންނާއި، ޖުވެލިންގ ތުރޯ އިވެންޓްތަކުން 4 ވަނަ ހޯދާފައެވެ. އަދި މުބާރާތުގެ ޑިސްކަސް ތުރޯއިން ސާޖަންޓް ފަސްޓް ކުލާސް އިބްރާހީމް ޝައުކަތު 6 ވަނަ ހޯދިއިރު، 5000 މީޓަރ ދުވުމުގައި ވާދަކުރި ކޯޕްރަލް މޫސާ ފަވާޒު މާލިކު ވަނީ އެ ރޭހުން 7 ވަނަ ހޯދާފައެވެ.