އެއަރ އެމްބިއުލާންސްގެ ޚިދުމަތަށް ޚާއްސަކޮށް ހެލިކޮޕްޓަރެއް އޮންނާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޤައުމީ ދިފާޢީބާރުގެ ވައިގެ ބާރު އިފްތިތާޙުކުރުމާއި، އަންމޭންޑް އޭރިޔަލް ވެހިކަލް ސިފައިންގެ ޚިދުމަތަށް ތަޢާރަފްކުރުމަށް ބޭއްވި ރަސްމިއްޔާތުގައި ރައީސް ވިދާޅުވީ މިއަހަރު ފެށުމަށް ހަމަޖެހިފައިވާ ހެލިކޮޕްޓަރުގެ ޚިދުމަތުގައި ހެލިކޮޕްޓަރު ވެސް ބޭނުން ކުރަން ފެށުމަށް ނިންމަވާފައިވާ ކަމަށެވެ.

ރައީސުލްޖުމްހޫރިއްޔާގެ ވަޢުދުފުޅާއެއްގޮތަށް އެއަރ އެމްބިއުލާންސްގެ ޚިދުމަތް ފަށާފައިވަނީ މިމަހުގެ ފުރަތަމަ ދުވަހުގައެވެ.

Advertisement

އެއަ އެމްބިއުލާންސް ގޮތުގައި މިހާރު ބޭނުން ކުރަމުން އަންނަނީ ޑޭޝް-8 މަރުކާގެ ބޯޓަކާއި ސަލާމަތީ ގޮތުން ރައްކާތެރި އަދި އިތުބާރު ކުރެވޭގޮތަށް ފަރުމާކޮށްފައިވާ ޑީއެޗްސީ-6 ޓްވިން އޮޓަރ ސީޕްލޭނެކެވެ.

ހެލިކޮޕްޓަރުގެ ޚިދުމަތް ތަޢާރަފްކުރުމާ ގުޅޭގޮތުން ޑރ. މުޢިއްޒު ވިދާޅުވީ މިއަހަރު ނިމުމުގެ ކުރިން ހެލިކޮޕްޓަރުގެ ޚިދުމަތް ފަށްޓަވާނެކަމަށެވެ. އަދި އެ ޚިދުމަތުގެ ތެރެއިން އެއް އުޅަނދު އެމްބިއުލާންސްގެ ޚިދުމަތަށް ޚާއްސަކުރައްވާނެކަމަށެވެ.

މިއާއެކު އެއަރ އެމްބިއުލާންސްގެ ގޮތުގައި 3 އުޅަނދު ބޭނުންކުރަން ފެށޭނެ ކަމަށާއި އެކަމުގެ ޤާބިލުކަން ވެސް ލިބިގެންދިޔަ ކަން ރައީސް ފާހަގަކުރެއްވިއެވެ.