މަޖިލިސް އިންތިހާބުގައި ތައިލެންޑް، ޔޫކޭ އަދި ޔޫއޭއީގައި ވޯޓުފޮށި ނުބަހައްޓާނެ ކަމަށް އިލެކްޝަންސް ކޮމިޝަނުން ބުނެފިއެވެ.

އެ ކޮމިޝަނުން ބުނީ އެގޮތަށް ނިންމީ ރީ ރަޖިސްޓަރީ ކުރުމުގެ ފުރުސަތު ހަމަވި އިރު ކޮމިޝަނުން ކަނޑައެޅިވަރަށް ވޯޓުލުމަށް މީހުން ރަޖިސްޓްރީވެފައި ނެތުމުން ކަމަށެވެ.

އެޕްރީލް 21 ވާ އާދިއްތަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ބޭރުގެ ހަ ގައުމެއްގައި ވޯޓު ފޮށި ބެހެއްޓުމަށް އިލެކްޝަނުން މީގެކުރިން ވަނީ ނިންމާފައެވެ. އެއީ އިންޑިއާ، ސްރީލަންކާ، މެލޭޝިއާ، ތައިލެންޑް، އިނގިރޭސިވިލާތް، އަދި އެކުވެރި އަރަބި އިމާރާތް، ޔޫއޭއީއެވެ.

Advertisement

އެހެންނަމަވެސް އިލެކްޝަނުން ބުނީ ރީ ރަޖިސްޓްރީވެފައިވާ އަދަދަށް ބަލާއިރު، ކޮމިޝަނުން ކަނޑައަޅާވަރަށް ވޯޓުލާނޭ މީހުން ނެތުމުން ތައިލެންޑް، އިނގިރޭސިވިލާތް އަދި ޔޫއޭއީގައި ވޯޓުފޮށި ނުބެހެއްޓުމަށް މިހާރު ނިންމާފައިވާކަމަށެވެ.

މީގެ އިތުރުން އިލެކްޝަނުން ވަނީ ކޮމިޝަނުން ކަނޑައަޅާފައިވާ ސީލިންގ ހަމަނުވުމުގެ ސަބަބުން ކުރިން ހަމަޖެއްސި ތަންތަނުގެ ތެރެއިން 23 ރިސޯޓެއްގެ އިތުރުން ހުޅުލޭގައިވެސް ވޯޓުފޮށި ނުބެހެއްޓުމަށް ނިންމާފައެވެ.

އިލެކްޝަނުން ވަނީ ވޯޓުފޮށި ނުބެހެއްޓުމަށް ނިންމި ތަންތަނުގައި ދިރިއުޅޭ އަދި މަސައްކަތްކުރާ ދިވެހިރައްޔިތުން، ރަށްވެހިވެފައިވާ ތަން ނޫން އެހެން ތަނެއްގައި ވޯޓުލުމަށްޓަކައި، ރަޖިސްޓަރީ ކުރުމަށް ހުޅުވާލާފައިވާ މުއްދަތުގެ ތެރޭގައި ރަޖިސްޓަރީ ކޮށް ނިންމުމަށް އެދިފައެވެ. މިގޮތުން މި މުއްދަތުގެ ތެރޭގައި ރަޖިސްޓަރީ ބަދަލު ނުކޮށްފިނަމަ އެ ފަރާތްތަކަށް ވޯޓު ލެވޭނީ ރަށްވެހިވެފައިވާ ރަށުގައި ކަމަށްވެސް އިލެކްޝަނުން ބުނެއެވެ.

މަޖިލީސް އިންތިހާބު ރީ ރަޖިސްޓްރޭޝަނަށް ހުޅުވާލުމުން އިއްޔެގެ ނިޔަލަށް ރާއްޖެއިން ބޭރުގައި ދިރިއުޅޭ ދިވެހިންގެ ތެރެއިން 1،338 މީހުން ރީ ރަޖިސްޓްރީކުރިކަމަށް އިލެކްޝަނުން ބުނެއެވެ. މީގެ ތެރެއިން އެންމެގިނަ މީހުން ރީރަޖިސްޓްރީކޮށްފައިވަނީ މެލޭޝިއާ އަދި ސްރީލަންކާއިންނެވެ.