ވެލެންސިއާ އަށް ކުޅުނު ސްޕެއިންގެ ދެ ކުޅުންތެރިން ކަމަށްވާ، ބޯހަސް މާޓިން އާއި ހޯޒޭ އެންޓޯނިއޯ ޑޮމިންގޭޒް އަށް ދޭން ޖެހޭ މުސާރައިގެ ގޮތުގައި ޖުމުލަ 48،000 ޑޮލަރު (740،160 ރުފިޔާ) ދައްކައި، ފީފާއިން ކުރިމަތި ކޮށްފައިވާ ޓްރާންސާފެ އަދަބުން އެ ކްލަބް ސަލާމަތް ކޮށްފި އެވެ.

ވެލެންސިއާގެ އޮފިޝަލް ބުނީ، ބޯހަސް ދޭން ޖެހޭ ފައިސާގެ ތެރެއިން އަދި ބާކީ ދެ މަސް އެބައިން ކަމަށެވެ. ނަމަވެސް އޭނާ އަށް ހަ މަހުގެ މުސާރަ ދީ، ފީފާއިން މައްސަލަ ނެގުމަށް އޭނާ އާ އެކު އެއްބަސްވެފައިވާ ކަމަށެވެ.

ހަ މަހުގެ މުސާރައިގެ ގޮތުގައި އޭނާ އަށް 30،000 ޑޮލަރު (492،6000 ރުފިޔާ) ދައްކާފައިވާ ކަމަށް އޮފިޝަލް ބުންޏެވެ.

Advertisement

"އަދި ވެސް ބޯހަސް އަށް ފައިސާ ދޭންޖެހޭ. ނަމަވެސް ހަ މަހުގެ މުސާރަ ޖަމާކޮށް ދިނުމުން އޭނާ އެއްބަސްވެއްޖެ ފީފާގައި އޮތް މައްސަލަ ނަގައިދޭން،" އޮފިޝަލް ބުންޏެވެ.

މިދިޔަ އަހަރު ވެލެންސިއާ އަށް ކުޅުނު ޑިފެންޑަރު ހޯޒޭ އަށް ދޭން ޖެހޭ ހުރިހާ ފައިސާއެއް ދައްކާފައިވާ ކަމަށް އޮފިޝަލް ބުންޏެވެ. މުސާރަ ނުދޭތީ ވަކި ހިސާބަކުން ޓީމަށް ނާންގައި ރާއްޖެއިން ފުރައިގެން ދިޔަ ހޯޒޭ އަށް 18،000 ޑޮލަރު (277،560 ރުފިޔާ) ދައްކާފައިވާ ކަމަށް އޮފިޝަލް ބުންޏެވެ. އެ ފައިސާގެ ތެރޭގައި އޭނާގެ މައްސަލައާ ގުޅިގެން ފީފާ އަށް ދައްކަން ޖެހުނު ޖޫރިމަނާ ފައިސާ ވެސް ހިމެނޭ ކަމަށް ވެސް އޮފިޝަލް ބުންޏެވެ.

މިދިޔަ ސީޒަންގައި އެ ޓީމަށް ކުޅުނު މިސްރުގެ ހަލީލް ޖަމާލް އަށް ވެސް ވެލެންސިއާއިން ދޭން ޖެހޭ ފައިސާ އެބަހުއްޓެވެ. އޮފިޝަލް ބުނީ ހަލީލް އާއި ދިވެހި ކުޅުންތެރިންނަށް ދޭން ޖެހޭ ފައިސާ ހަމަޖެއްސުމަށް ކްލަބްގެ މެނޭޖުމެންޓުން މަސައްކަތް ކުރަމުން އަންނަ ކަމަށެވެ.

އެކަމަކު ޓްރާންސްފާގެ އަދަބުން ސަލާމަތް ވުމުން މި މަހު ފަހުކޮޅު އަންނަ ޓްރާންސްފާ ޕީރިއަޑްގައި އެ ދެ ކުޅުންތެރިން އެ ކްލަބްގައި ރަޖިސްޓްރީ ކުރެވޭނެ އެވެ.