ކުޑަކުދީންނަށް ޖިންސީ ގޯނާ ކުރާ މީހުންނަށް މައާފް ދިނުން ބަލައެއް ނުގަނެވޭނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ކުޑަކުދިީންނަށް ޖިންސީ ގޯނާކުރިކަމުގެ ތުހުމަތުގައި ހައްޔަރުކޮށް، ނުވަތަ އެކުށް ސާބިތުވެ، ހުކުމް ކޮށްފައިވާ މީހުންނަށް މައާފުދިނުން އަދި ލުއިދީ ދޫކޮށްލުމަކީ އެއްގޮތަކަށްވެސް ބަލައިގަނެވޭނޭ ކަމެ ނޫން ކަމަށެވެ.

އެގޮތަށް ނިންމާ ނިންމުންތައް ލަސްނުކޮށް އިސްތިއުނާފު ކުރުމަށް ސަރުކާރުން ޕްރޮސެކިއުޓަރ ޖެނެރަލްގެ އޮފީސް (ޕީޖީ) ގައި އެދެމުންދާ ކަމަށް ވެސް ވިދާޅުވިއެވެ.

Advertisement

މީގެ އިތުރުން ދިވެހި މުޖުތަމައަކީ އެފަދަ ނުބައި ފަރާތްތަކުގެ ނުބައި ވަކިތަކުން ސަލާމަތްވެފައިވާ މުޖުތަމައަކަށް ހެދުމަށް އެންމެން އެކުގައި މަސަކަތް ކުރުމަށް ވެސް ރައީސް ވަނީ އެދިވަޑައިގެންފައެވެ.

ރައީސް މިފަދައިން ވިދާޅުވެފައި މިވަނީ ކުޑަކުދިންގެ އޮރިޔާން ފޮޓޯ ޑައުންލޯޑު ކުރުމުން ދައުވާ ނުކޮށް ޕީޖީ އޮފީހުން ނަސޭހަތުގެ އެއްބަސްވުމެއް ހަދައިފައިވަނިކޮށެވެ. ޕީޖީ އޮފީހުން ބުނީ ކުޑަކުދިންގެ އޮރިޔާން ކާޑު ގެންގުޅުން ގާނޫނުގައި ވަކި ކުށެއްގެ ގޮތުގައި ނޯންނަ ކަމަށާއި ހަމަ އެކަނި އޮންނަނީ އޮރިޔާން ކާޑު ގެންގުޅުމުގެ ކުށް ކަމަށެވެ. އެއީ އަސާސީ އަދަބަކަށް 1 މަހާއި 24 ދުވަހުގެ ޖަލު ހުކުމެއް އޮންނަ ކުށެކެވެ.