ގައިންގަޔަށް ނާރާ ބަލިތައް އިތުރުވާ ސަބަބު ދެނެގަތުމަށް ދިރާސާއެއް ހެދުމަށް ނިންމާފައިވާކަމަށް ހެލްތު މިނިސްޓަރ ޑރ. އަބްދުﷲ ޚަލީލް ވިދާޅުވެއްޖެއެވެ.

މިނިސްޓަރ ވިދާޅުވީ ރާއްޖޭގައި ގައިން ގަޔަށް ނާރާ ބަލިތައް އިތުރުވަމުންދާކަން ފާހަގަކުރެވޭ ކަމަށާއި މިކަމުގެ ސަބަބުތައް ދެނެގަތުމަށް ބޭރުގެ ޖަމުޢިއްޔާތަކާއި ގުޅިގެން މިކަމާއި ގުޅޭ ދިރާސާތައް ކުރުމަށް މަސައްކަތްކުރަމުންދާ ކަމަށެވެ. އަދި ރާއްޖޭގައި ކެންސަރު ބަލިވެސް ވަރަށް ބޮޑަށް އިތުރުވަމުން އަންނަ ކަމަށް ވިދާޅުވިއެވެ.

މީގެއިތުރުން ބައެއް ރަށްތަކުގައި ވެސް މި ބަލި ފެތުރޭ މިންވަރު އެހެން ރަށްތަކަށްވުރެ އިތުރުކަން ވެސް ފާހަގަކުރެއްވިއެވެ.

Advertisement

ރާއްޖޭގެ ސިއްޙީ ދާއިރާގެ ތަފާސް ހިސާބުތައް ދައްކާގޮތުގައި ގައިން ގަޔަށް ނާރާ ބޮޑެތި ބަލިތައް ރާއްޖޭގައިވެސް އަންނަނީ އިތުރުވަމުންނެވެ.

ރާއްޖޭގައި މަރުވާ މީހުންގެ ނިސްބަތުން %84 މީހުންނަކީ ގައިންގަޔަށް ނާރާ ބަލިތަކުގައި މަރުވާ މީހުންކަން ތަފާސް ހިސާބުތަކުން ދައްކައެވެ. ދުނިޔޭގެ އެހެން ޤައުމުތަކޭ އެއްގޮތަށް ކެންސަރު ބަލި ޖެހޭ މީހުން ރާއްޖޭގައިވެސް އަންނަނީ ވަރަށް ބޮޑަށް އިތުރުވަމުންނެވެ.