ގދ. ތިނަދޫ ރަށު ކައުންސިލަށް ސިޓީ ކައުންސިލެއްގެ ދަރަޖަ ދޭ ގޮތަށް ގާނޫނަށް ގެނައި އިސްލާހު ރައީސް ޑރ. މުހައްމަދު މުއިއްޒު ތަސްދީގު ކުރައްވައިފިއެވެ.

މިއީ އެމްޑީޕީގެ ފަރާތުން ތުޅާދޫ ދާއިރާގެ މެންބަރު ހިސާން ހުސައިން ހުށަހަޅުއްވި ބިލެކެވެ.

މި ބިލު، މިދިޔަ ހޯމަ ދުވަހު ރައްޔިތުންގެ މަޖިލީހުން ވަނީ 42 މެންބަރުންގެ ތާއީދާ އެކު ފާސްކޮށްފައެވެ. މި ބިލަކީ ސިޓީ ކައުންސިލަކަށް ލިބިގެންވާ އެންމެހާ ބާރުތައް ތިނަދޫ ކައުންސިލަށް ލިބުމުގައި ގާނޫނީ ހުރަސްތަކެއް ހުރުމުން އެކަން ހައްލުކުރުމަށް ލާމަރުކަޒީ ގާނޫނަށް އިސްލާހު ގެނައުމަށް ހުށަހެޅި ބިލެވެ.

Advertisement

މި އިސްލާހުގައި ބުނެފައިވަނީ ސިޓީއެއްގެ ދަރަޖަ ދޭ ރަށެއްގެ ކައުންސިލުގެ ފަސް އަހަރުގެ ދައުރުގެ ބާކީ އެއް އަހަރު ދުވަހަށް ވުރެ ކުރު މުއްދަތެއް އޮތް ނަަމަ، ސިޓީ ކައުންސިލަަކަށް އެ ކައުންސިލް ބަދަލުވާނީ އަލަށް އިންތިހާބުވާ ކައުންސިލަކުން ފެށިގެން ކަމަށެވެ. އަދި، އެ ކައުންސިލެއްގެ ދައުރުގެ ބާކީ އެއް އަހަރަށް ވުރެ ދިގު މުއްދަތެއް އޮތް ނަމަ އެ ރަށަކީ ސިޓީއެއް ކަމުގައި ކަނޑައަޅައި، އެ ރަށް ސިޓީއަކަށް ބަދަލުވާނެ ކަމަށް؛ އެ އާއެކު އޭރު އިންތިހާބުކޮށްފައިވާ ރަށު ކައުންސިލް ވެސް ސިޓީ ކައުންސިލަކަށް ބަދަލުވާނެ ކަމަށްވެސް ބުނެފައިވެއެވެ.

އެހެންކަމުން ރައީސް މި ބިލު ތަސްދީގު ކުރެއްވުމާ އެކު، މިއަދުން ފެށިގެން މިހާރު އޮތް ތިނަދޫ ރަށު ކައުންސިލް، ސިޓީ ކައުންސިލަކަށް ބަދަލުވުމަށް ހުރަހެއް ނެތެވެ.

އިސްލާހުގެ 51 ވަނަ މާއްދާގެ (ރ) ގައި ވާގޮތުން ރަށު ކައުންސިލަކަށް ސިޓީ ކައުންސިލެއްގެ ދަރަޖަ ލިބޭއިރު ކައުންސިލްގެ ރައީސްއަކަށް ހުންނަ މީހަކު ސިޓީގެ މޭޔަރަށް އަދި ނައިބު ރައީސް ޑެޕިއުޓީ މޭޔަރަށް ބަދަލުވާނެއެވެ. އޭގެ އިތުރުން ރަށު ކައުންސިލް މެންބަރުން ސިޓީ ކައުންސިލްގެ މެންބަަރުންނަށް ބަދަލުވާނެ ކަމަށް ވެސް ވަނީ ބުނެފައެވެ.

މިހާރު އޮތް ތިނަދޫ ކައުންސިލްގެ ފަސް އަހަރުގެ ދައުރު ހަމަވާނީ 2026 ވަނަ އަހަރުއެވެ.

ސިޓީއެއްގައި ހުންނަން ޖެހޭ ހުރިހާ ޝަރުތެއް ތިނަދޫގައި ފުރިހަމަވެފައިވާ ކަމަށް ވިދާޅުވެ، އެ ރަށަކީ ސީޓީއެއް ކަމަށް އިއުލާން ކުރެއްވީ ނިމުނު ރިޔާސީ އިންތިޚާބުގެ ކެމްޕެއިންގެ ތެރެއިން ކުރީގެ ރައީސް އިބްރާހީމް މުހައްމަދު ސާލިހް ތިނަދުއަށް ކުރެއްވި ދަތުރުފުޅުގައެވެ.