މި ރަމަޟާން މަހުގެ ފުރަތަމަ 20 ދުވަސް ނިމި، ފަހު ދިހަޔަކަށް އެޅިއިރު، މާލޭގެ މިސްކިތްތަކުން ވައްކަން ކުރުމާއި މިސްކިތްތަކަށް ގެއްލުން ދިނުން މިވަނީ އާންމުވެފައެވެ.

އެގޮތުން މާލޭގެ ދަރުވަމަންވަންތަ މިސްކިތުގެ ފާރުގައި ހަރުކޮށްފައިހުރި ދެ ފަންނާއެއް ވަގަށް ނަގާފައިވާއިރު، އެ މިސްކިތުގެ ފެންމޯޓަރު ވެސް ވަނީ ވަގަށް ގެންގޮސްފައެވެ.

މީގެ އިތުރުން ތަގްވާ މިސްކިތުން ތިން ރޭގެމަތީން ހަތް ފަންކާއެއް ވެސް ވަގަށް ނަގާފައިވެއެވެ. 

Advertisement

ހަމަމިއާއެކު ބަންޑާރަ މިސްކިތުގެ އަންހެނުންގެ ފާޚާނާގެ ތައްޓާއި ވިޔަފާރިވެރިންގެ މިސްކިތުގެ އަންހެނުން ވުޟޫކުރާ ބައިގެ ފެން އިސްކުރުތަކަށް ވެސް ބަޔަކުމީހުން ވަނީ ގެއްލުންދީފައެވެ.

ކަންމިހެން ހުރިއިރު، މާލޭގައި ވައްކަންކުރުން އިންތިހާ އަށް އިތުރުވެ، ފިހާރަތަކުން ވެސް އަންނަނީ ރޯމާދުވާލު ވެސް ވައްކަން ކުރަމުންނެވެ. މަގު ފޭރުން ވެސް އިންތިހާއެވެ.

މިފަދަ މަންޒަރުތައް ފެންނަ ވީޑިއޯ ފުޓޭޖުތައް ނުވަތަ ސީސީޓީވީ ފުޓޭޖުތައް ވެސް އާންމުވެއެވެ. މައްސަލަ ކަމާއިގުޅުން ހުރި މުއައްސަސާތަކަށް ވެސް ހުށަހަޅައެވެ. އެފަދަ ފަރާތްތަކުން ހަމައެކަނި ބުނެލާ ބަހަކީ މައްސަލަ ތަހުގީގުކުރަމުންދާ ކަމަށެވެ. ނުވަތަ ލިބިފައިވާ ވީޑިއޯތަކަށް ރިޔާއަތްކޮށް ގުޅުންހުރި މައުލޫމާތު އެއްކުރައްވާ ވާހަކައެވެ. ދެން ދަނީ ބޮޑުނަގުލަށެވެ.

ރައްޔިތުންގެ މުދަލަށް ގެއްލުންދީ، މިސްކިތްތަކުގެ ހުރުމަތް ކަނޑައި، މިސްކިތްތަކުން ވައްކަންކުރުމަށްފަހުު އެވެރިން އެ އުޅެނީ އެއްވެސް ބިރެއްނެތިއެވެ. ނޫންނަމަ ގާނޫނަށް ވެސް ބެލުމެއް ނެތިއެވެ. 

ކަމާއިބެހޭ ފަރާތްތަކުން އަތްއުރާލައިގެން ތިބެގެން މިއަދުވާކަށް ނެތެވެ. ރައްޔިތުންނަށް ކުރިމަތިވެފައިވާ މި ބިރުވެރިކަމަށް ތަސައްލީއެއް ގެނެސްދޭން މަސައްކަތްކުރަމުންދާކަން އެންމެކުޑަމިނުން ރައްޔިތުންނަށް އަންގައިދޭން ޖެހެއެވެ. ރައްޔިތުންނަށް އެކަން ފަހުމުވާވަރަށް އެކަން ކުރެވޭކަން ދައްކަން ޖެހެއެވެ.