އަގަކާނުލައި މަޖިލީހުގެ ސުޕަރ މެޖޯރިޓީ ސަރުކާރަށް ދެއްވުމަށް ދިވެހިރައްޔިތުންގެ ކިބައިން ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ އެދިލައްވައިފިއެވެ.

އޭނާ ވިދާޅުވީ ރައީސް ޑރ. މުއިއްޒު ވެރިކަމާ ހަވާލުވެވަޑައިގެންއިރު ޤައުމު އޮތީ އިޤުތިޞާދީ ގޮތުންނާއި އިޖުތިމާޢީ ގޮތުން ބަނގުރޫޓުވެ، އިނދަޖެހުމާއި ގާތުގައި ކަމަށެވެ.

މަޖިލީހުގެ މެޖޯރިޓީ އޮތް ފަރާތްތަކުގެ އަމިއްލަ އެދުމާއި ސިޔާސީ ހަލަބޮލިކަމުގެ ސަބަބުން ރައްޔިތުންގެ ލާބައަށް ކަންކަން ކުރުމަށް ހަދަންޖެހޭ އެތައް ޤާނޫނަކާ ޤާނޫނުތަކަށް ގެންނަންޖެހޭ އެތައް އެތައް އިސްލާޙެއްގައި އޮތީ މަރުތަޅު އަޅުވާފައި ކަމަށް ވެސް ވިދާޅުވިއެވެ.

Advertisement

މީގެއިތުރުން މި ހާލަތުން އަރައިގަތުމަށްޓަކައި ކުރަން އޮތް އެންމެ ބޮޑު ޤައުމީ މަސައްކަތަކީ ލޯނުތައް ރިސްޓަރަކްޗަރ ކުރުމާއި މާލީ ނިޒާމު އިސްލާހުކުރުން ކަަމަށް ފަހުމީ ވިދާޅުވިއެވެ. އަދި ޤާނޫނީ އޮނިގަނޑު މެދުވެރިކޮށް ހެޔޮބަދަލުތައް ގެނައުން ކަމަށް ވެސް ވިދޅާުވިއެވެ.

ފަހުމީ ވިދާޅުވީ އެއާއިއެކު ރައްޔިތުންނަށް ބޯހިޔާވަހިކަން ކަށަވަރުކޮށްދީ، މާލެއަށް ބަރޯސާނުވެ އަސާސީ ބޭސްފަރުވާކުރެވޭނެ ނިޒާމެއް ޤާއިމްކޮށްދީ، ފަޚުރުވެރިކަމާއިއެކު އާމްދަނީ ހޯދޭނެ މަގުތައް ކޮށައިދިނުން ކަމަށް ވެސް ވިދާޅުވިއެވެ.

އޭނާ ވިދާޅުވީ މިކަން ކުރެވޭނީ މަޖިލީހުގެ ސުޕަރ މެޖޯރިޓީ އަގަކާނުލައި ހެޔޮ ހިތުން ސަރުކާރަށް ތާޢީދުކުރާ، ޤައުމީ ލާބައަށްޓަކައި ސަރުކާރާއިއެކު، ރައީސް ޑރ. މުޢިއްޒުގެ ދުވެލީގައި މަސައްކަތް ކުރައްވާނެ ކެނޑިޑޭޓުންނަށް ދީގެން ކަމަށެވެ. އަދި ޤައުމީ މަސްލަހަތު އިސްކުރައްވައި ސަރުކާރު ބާރުވެރި ކުރުވައިގެން ކަމަށެވެ.

ޤައުމީ މި މަސައްކަތުގައި ހުރިހާ ދިވެހިން އެކުގައި އެއްބައިވަންތަކަމާއިއެކު ކުރިއަށް ދިއުމަށް ފަހުމީ ވަނީއެދލިައްވާފައެވެ.