ފިތުރު ޒަކާތް ބަހަން ފަށައިފިއެވެ.

މިހާރު ބަހަން ފަށާފައިވަނީ މާލޭގައި ފަގީރުންގެ ގޮތުގައި ދަފްތަރުކޮށްފައިވާ ފަރާތްތަކަށެވެ.

މާލެއަށް ފިތުރު ޒަކާތް ދެއްކި އަދަދު އިތުރުވިކަން ފާހަގަ ކުރައްވާ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ، މާލޭގައި ފަގީރުންގެ ގޮތުގައި ދަފްތަރު ކުރެވިފައިވާ ކޮންމެ މީހަކަށް 8000 ރުފިޔާގެ ރޭޓުން ފިތުރު ޒަކާތް ބަހަން ފަށާފައިވާ ކަމަށެވެ.

Advertisement

ފައިސާ ޖަމާވާނީ އެމީހާގެ ސީދާ އެކައުންޓަށް ކަމަށާއި އެކި ސަބަބުތަކާހުރެ ޖަލުގައި ބަންދުވުމުގެ ސަބަބުން އަނބި ދަރިންނަށް ނިކަމެތި ކަން މެދުވެރި ވެފައިވާ ފަރާތްތަކުގެ އާއިލާތަކަށް ވެސް ފިތުރު ޒަކާތުން އެހީތެރިކަން ލިބޭނެ ކަމަށް މިނިސްޓަރު ވިދާޅުވިއެވެ.

މީގެ އިތުރުން ވެސް ކުޑަކުދިންގެ ހިޔާއާއި ހާއްސަ އެހީއަށް ބޭނުންޖެހިފައިވާ ފަރާތްތަކުގެ މަރުކަޒުގައި ތިބި ފަރާތްތަކަށްވެސް ފިތުރު ޒަކާތް ލިބޭނެ ކަމަށް ޒަކާތުގެ ހައުސްގެ ޗެއާމަންކަންވެސް ކުރަމުންދާ ޑރ. މުހައްމަދު ޝަހީމް އަލީ ސައީދު ވިދާޅުވިއެވެ.

ރޯދަ މަހުގެ 20 ވަނަ ދުވަހުގެ ނިޔަލަށް 4.49 މިލިއަން ރުފިޔާ ފުތުރު ޒަކާތުގެ ގޮތުގައި ލިބިފައިވާ ކަމަށް ޒަކާތު ހައުސްއިން ވަނީ މީގެ ކުރިން ބުނެފައެވެ.