ވ. އާރަށް ކުއްޔަށް ދޫކުރުމުގެ މުއާމަލާތުގައި ރިޝްވަތު ނަންގަވައި އެ ފައިސާ ލޯންޑަކުރި ކަމުގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒްކުރައްވަމުން ގެންދަވާ ކުރީގެ ރައީސް ޔާމީން އަބްދުލްގައްޔޫމްގެ އިސްތިއުނާފީ މައްސަލައިގައި ހުކުމްކުރުން މާދަމާ އަށް ތާވަލުކޮށްފިއެވެ.

ހައިކޯޓުގައި ކުރިއަަށްދާ މި މައްސަލައިގެ ހުކުމް އިއްވުން މާދަމައަށް ތާވަލުކޮށްފައިވާއިރު، އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރ ކުރިކަމުގެ ކުށުގައި ޔާމީން 11 އަހަރަށް ޖަލަށްލުމަށާއި ފަސް މިލިއަން ޑޮލަރުން ޖޫރިމަނާކުރަން ކްރިމިނަލް ކޯޓުން ހުކުމް ކުރީ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.

އެ ހުކުމް މިދިޔަ އަހަރުގެ ކުރީކޮޅު ހައި ކޯޓުގައި އިސްތިއުނާފްކޮށްފައިވާއިރު، އެ މައްސަލައިގައި މިހާތަނަށް އައިއިރު، ހުކުމް އިއްވާފައެއް ނުވެއެވެ. އެކަމަކު، މި މައްސަލައިގެ އަޑުއެހުންތައް ހައި ކޯޓުގައި ނިންމާލައި އެ މައްސަލަ އޮތީ ހުކުމަކާ ހިސާބުގައެވެ.

Advertisement

ކްރިމިނަލް ކޯޓުގެ މި ހުކުމުގެ ސަބަބުން އެމަނިކުފާނަށް މިދިޔަ އަހަރުގެ ސެޕްޓެމްބަރު މަހު އޮތް ރިޔާސީ އިންތިޚާބުގައި ވެސް ވާދަކުރެއްވޭގޮތް ނުވިއެވެ.

ރައީސް ޔާމީންގެ ވަކީލު އާދަމް ޝަމީމް ވިދާޅުވި ގޮތުގައި ހައިކޯޓުގައި މި މައްސަލަ ތާވަލުކޮށްފައި ވަނީ މާދަމާ 13:00 ގައެވެ.

މި މައްސަލައިގައި ހައި ކޯޓުގައި އެންމެ ފަހުން އަޑު އެހުމެއް ބޭއްވީ މިދިޔަ ނޮވެމްބަރު 21 ގައެވެ. އެ ދުވަހު ކުރިއަށް ގެންދިޔައީ މައްސަލައިގެ ފަހުބަސް އިއްވުމެވެ. އެއަށްފަހު ތަފާތު އެކި ސަބަބުތަކާ ހުރެ މި މައްސަލައިގެ އަޑުއެހުމެއް ބޭއްވޭގޮތެއް ނުވިއެވެ.