ކ. މަފުށީގައި ލޯކަލް އެތޯރިޓީ ކުންފުންޏެއް ހުޅުވައިފިއެވެ.

ލޯކަލް ޓޫރިޒަމް އެންމެ ބޮޑަށް ކުރިއަރާފައިވާ އެ ރަށުގައި މި ކުންފުނި ހުޅުވުމާ ގުޅިގެން ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު އެކްސްގައި ކުރެއްވި ޕޯސްޓެއްގައި ވިދާޅުވީ މާފުށީގައި ލޯކަލް އޮތޯރިޓީ ކުންފުންޏެއް ހުޅުވާފައިވާ ކަމަށެވެ.

މިކަމުގެ ސަބަބުން ރަށުގެ އިގްތިސާދީ ދުވެލި ހަލުވިވާނެ ކަމަށާއި ރައްޔިތުންނަށް ބޭނުންވާ މުނިސިޕަލްގެ ހިދުމަތްތައް ދިނުން އަވަސް ވާނެ ކަމަށް އުންމީދު ކުރައްވާ ކަމަށެވެ.

Advertisement

މިއީ ރާއްޖޭގައި ހުޅުވުނު ހަވަނަ ލޯކަލް އޮތޯރިޓީ ކުންފުނިކަން ވެސް މިނިސްޓަރ ފާހަގަކުރެއްވިއެވެ.

އެންމެ ފުރަތަމަ ލޯކަލް އޮތޯރިޓީ ކުންފުންޏެއް ރަޖިސްޓްރީ ކުރީ އއ. ތޮއްޑޫ ކައުންސިލުން ޑިސެމްބަރު 19، 2022 ގައިއެވެ.

އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ވަނީ “ކައުންސިލްތަކުން ލޯކަލް އޮތޯރިޓީ ކުންފުނި އުފެއްދުމާއި އަމިއްލަ ފަރާތްތަކާ އެކު ވިޔަފާރިކުރުމާ ބެހޭ ގަވައިދު” އޭޕްރީލް، 2021، ގައި ގެޒެޓުކޮށްފައެވެ.

އެ ގަވާއިދާއެކު ކުންފުނި ހަދައިގެން ކައުންސިލްތަކުން ވިޔަފާރިކުރެވޭނެ ފުރުސަތު ވަނީ ކައުންސިލްތަކަށް ފަހިވެގެން ގޮސްފައެވެ.