ހުރިހާ މަރުކަޒެއްގައި ވޯޓުލުން ފަށައިފިއެވެ.

އިލެކްޝަން ކޮމިޝަނުން ބުނީ ވޯޓުލާ މަރުކަޒުތަކަށް ބޭނުންވާ ހުރިހާ އޮފިޝަލުންނާ ތަކެތި ހަމައަށް ފޮނުވާފައިވާ ކަމަށެވެ. އަދި ވޯޓުނެގުން ހުރިހާ މަރުކަޒެއްގައި ފަށަފައިވާ ކަމަށެވެ.

މަޖިލިސް އިންތިހާބުގައި އަމިއްލަ ގޮތުން 130 ކެންޑިޑޭޓަކު ވާދަ ކުރެއެވެ. އަދި ސިޔާސީ ހަތް ޕާޓީން 238 ފަރާތެއް ވެސް ވާދަ ކުރެއެވެ. އެއީ 216 ފިރިހެނުންނާއި 22 އަންހެނުންނެވެ.

Advertisement

ރައްޔިތުންގެ މަޖިލީހުގެ އިންތިހާބުގައި ރާއްޖެ އާއި ރާއްޖެއިން ބޭރުގައި 602 ވޯޓު ފޮށި ބެހެއްޓުމަށް ވަނީ ނިންމައިފައެވެ. މާލޭގައި 181 އަދި ހުޅުމާލޭގައި 51 ވޯޓު ފޮށި ބަހައްޓައެވެ.

އަދި ވިލިމާލޭގައި ނުވަ ވޯޓު ފޮށި ބަހައްޓާއިރު، އަތޮޅު ތެރޭގެ ރަށްތަކުގައި 319 ވޯޓު ފޮއްޓެއް ބަހައްޓައެވެ. އަދި ޖަލުތަކުގައި ފަސް ވޯޓު ފޮއްޓެއް ބަހަަައްޓާއިރު، ރިސޯޓްތަކުގައި 34 ވޯޓު ފޮއްޓެއް ބަހައްޓައެވެ. އޭގެ އިތުރުން ރާއްޖެއިން ބޭރުގައި ތިން ވޯޓު ފޮއްޓެއް ބަހައްޓައެވެ.

މަޖިލިސް އިންތިހާބުގައި ވޯޓުލެވޭ މީހުންގެ އަދަދު 284،887 އަށް އަރައެވެ.