ޔޫކްރޭންގެ ދެކުނާއި އިރުމަތީ ސަރަހައްދުގެ އަމާޒުތަކަށް ރަޝިޔާއިން ވަނީ ޑްރޯންތަކާއި ބެލިސްޓިކް މިސައިލްތައް ބޭނުންކޮށްގެން ވައިގެ ހަމަލާތައް ދީފައި ކަމަށް ޔޫކްރޭންގެ ވައިގެ ސިފައިން ބުނެފި އެވެ.

ދެކުނުގެ އޮޑެސާ ބަނދަރާއި މައިކޮލައިވް، ޑޮނެޓްސްކް، ޚެރްސަން، ޒަޕޮރިޒިއާ އަދި ޑްނިޕްރޮޕެޓްރޮވްސްކް ސަރަހައްދުތަކަށް ވެސް ރަޝިޔާގެ ޑްރޯން ހަމަލާތަކުގެ ނުރައްކާ އޮތް ކަމަށް ވައިގެ ސިފައިން ޓެލެގްރާމް މެދުވެރިކޮށް ބުނެފައިވެއެވެ.

އަދި ރަޝިޔާއިން ބެލިސްޓިކް ހަތިޔާރު ބޭނުންކޮށްގެން ޕޮލްޓާވާ، ޗެރްކާސީ، ޑްނިޕްރޮޕެޓްރޮވްސްކް، ޚާރކިވް އަދި ކިރޯވޮހްރާޑް ސަރަހައްދުތަކަށް ހަމަލާދީފާނެ ކަމަށް ވައިގެ ސިފައިން އިތުރަށް ބުނެއެވެ.

Advertisement

އޮޑެސާ ސަރަހައްދުގެ އަސްކަރީ ވެރިޔާ އޮލެހް ކިޕާ ވިދާޅުވީ އެތަނުގެ ވައިގެ ދިފާއީ ނިޒާމުތަކުން ރަޝިޔާގެ ޑްރޯން ހަމަލާތައް ދިފާއު ކުރަމުން އަންނަ ކަމަށެވެ.

"އެތައް ހަމަލާތައް ލިބުމުގެ ފުރުސަތު އެބައޮތް،" ޓެލެގްރާމްގައި ކިޕާ ބުންޏެވެ.

ޔޫކްރޭންގެ ދެކުނުގެ އޮޑެސާ ސަރަހައްދަށް މި ހަމަލާ ދީފައިވަނީ ކަޅު ކަނޑުގެ ބަނދަރުތަކުން ޔޫކްރޭންގެ ދަނޑުވެރިކަމުގެ ބާވަތްތައް ރައްކާތެރިކަމާއެކު އެކްސްޕޯޓް ކުރުމުގެ ހުއްދަ ދިން އެއްބަސްވުން އިތުރު ކުރަން ރަޝިޔާއިން ދެކޮޅު ހެދިތާ ގަޑިއެއްހާއިރު ފަހުންނެވެ.

މީގެ އިތުރުން އީރާނުން އުފައްދާފައިވާ ޝާހިދު ޑްރޯންތަކުން މައިކޮލައިވް ސަރަހައްދުގެ އަމާޒުތަކަށް ހަމަލާދޭ ކަމުގެ ރިޕޯޓްތައް ވެސް ސޯޝަލް މީޑިއާގައި ފެތުރިފައިވެ އެވެ.