20 ވަނަ ރައްޔިތުންގެ މަޖިލިސް އިންތިޚާބުގައި އަމިއްލަގޮތުން ވާދަކުރައްވާ، ކާމިޔާބު ހޯއްދެވި 6 މެމްބަރުން ޕީއެންސީ އަށް ސޮއި ކުރައްވައިފިއެވެ.

އެ މެމްބަރުން ސޮއި ކުރައްވާފައިވަނީ މިކަަމަށްޓަކައި ބޭއްވި ހާއްސަ ރަސްމިއްޔާތެއްގައެވެ.

މި މެންބަރުންގެ ފޯމާއި ޙަވާލުވެވަޑައިގަތީ ރައީސުލްޖުމްހޫރިއްޔާ އަދި ސަރުކާރު ހިންގާ ޕްރޮގްރެސިވް ކޮންގްރެސް ކޯލިޝަންގެ ލީޑަރ އަދި ޕީއެންސީގެ ރައީސް ޑރ. މުޙައްމަދު މުޢިއްޒެވެ.

މި ރަސްމިއްޔާތުގައި ދައުލަތުގެ ވަޒީރުންނާއި، ޕްރޮގްރެސިވް ކޮންގްރެސް ކޯލިޝަންގެ ލީޑަރޝިޕްގެ ބައެއް ބޭފުޅުން ވަނީ ބައިވެރިވެވަޑައިގެންފައެވެ.

ޕީއެންސީ އާ ގުޅުނު މެމްބަރުންނަކީ ޑރ. އަނާރާ ނަޢީމް – ހުރާ ދާއިރާއާއި ޙަސަން ޒަރީރު – މަތިވެރި ދާއިރާއާއި އަހްމަދު ޒަމީރު – މައްޗަންގޮޅި މެދު ދާއިރާއާއި އަޙްމަދު ރިޔާޒް – ތިމަރަފުށި ދާއިރާ އަދި ޔާސީން ޢަބްދުﷲ - ނައިފަރު ދާއިރާ އާއި ޢާޒިމް ޢަބްދުލް ޢަޒީޒް – ވިލިނގިލި ދާއިރާއެވެ.

 20 ވަނަ ރައްޔިތުންގެ މަޖިލިސް އިންތިޚާބުގައި ޕީޕަލްސް ނެޝެނަލް ކޮންގްރެސް، ޕީ.އެން.ސީގެ ފަރާތުން 90 ދާއިރާއަކަށް ވާދަކުރެއްވިއެވެ.

އިލެކްޝަންސް ކޮމިޝަންގެ ވަގުތީ ނަތީޖާދައްކާގޮތުން މީގެ ތެރެއިން 66 ކެންޑިޑޭޓުން ވަނީ އިންތިޚާބު ކާމިޔާބުކުރައްވާ ދާއިރާގެ ގޮނޑި ކަށަވަރުކުރައްވާފައެވެ.

މިއީ މިހާތަނަށް ނަތީޖާ ދައްކާގޮތުން 20 ވަނަ މަޖިލީހުގެ ސުޕަރ މެޖޯރިޓީއެވެ. ސުޕަރ މެޖޯރިޓީއަށް ބޭނުންވާނީ 63 ގޮނޑިއެވެ. ޕީ.އެން.ސީއާ އަލަށް ގުޅުނު މި 6 މެންބަރުންނާއެކު، ކުރިއަށްއޮތް 20 ވަނަ މަޖިލީހުގައި އެޕާޓީ ތަމްޞީލުކުރާނެ މެންބަރުގެ އަދަދު މިހާރު މިވަނީ 72 އަކަށް އަރާފައެވެ.

މީގެ އިތުރުން ސަރުކާރާއެކު މަސައްކަތް ކުރާ ޕާޓީތަކުގެ ލީޑަރުން ކާމިޔާބު ކުރެއްވި ގޮނޑިތައް ހިމެނޭހެން ޖުމްލަ 75 ގޮނޑި މި އިންތިޚާބުގައި ސަރުކާރަށް ވަނީ ކަށަވަރުކުރެވިފައެވެ. މިއީ 20 ވަނަ ރައްޔިތުންގެ މަޖިލީހުގެ ސާފު އަޣުލަބިއްޔަތެވެ.