ޕީޕަލްސް ނޭޝަނަލް ފްރަންޓް (ޕީއެންއެފް) ސިޔާސީ ޕާޓީތަކުގެ ދަފްތަރުގައި ރަސްމީކޮށް ރަޖިސްޓްރީކޮށްދީފިއެވެ.

ސިޔާސީ ޕާޓީތަކުގެ ދަފްތަރުގައި ޕީއެންއެފް ރަޖިސްޓްރީކުރިކަމުގެ ލިޔުން 'އެކްސް'ގައި ހިއްސާކުރައްވައި އެ ޕާޓީގެ އަމީންއާންމު އަދި ކުރީގެ ޓެކްނޮލޮޖީ ވަޒީރު މުހައްމަދު މަލީހު ޖަމާލު ވިދާޅުވީ އެ ޕާޓީ ކިތަންމެ ދައްޗަކާ އެކީ އުފަންކުރަން ޖެހުނު ނަމަވެސް، ޕާޓީ ދާނީ ކުރިޔަށް ވަރުގަދަކޮށް ކަމަށެވެ.

ސިޔާސީ ޕާޓީތަކުގެ ދަފްތަރުގައި ޕީއެންއެފް ރަޖިސްޓްރީކުރީ ރައީސް ޔާމީންގެ ދަރިކަލުން ޒެއިން ޔާމީންގެ ނަމުގައި މިއަދުއެވެ.

Advertisement

އެޕާޓީ ރަޖިސްޓްރީކުރުމަށް ބާއްވަންޖެހޭ ޖަލްސާ ބޭއްވުމަށް ޣިޔާސުއްދީން ސްކޫލު ނުލިބުމުން އެ ޖަލްސާ ބާއްވާފައިވަނީ ރާޅުގަނޑު ސަރަހައްދުގައެވެ.

ރައީސްކަމަށް ޒެއިން ހޮވައި، ޕާޓީގެ ސެކްރެޓަރީ ޖެނެރަލްގެ މަގާމަށް ޕާޓީ އުފެއްދުމުގައި އިސްކޮށް ހަރަކާތްތެރިވެވަޑައިގެންނެވި މަލީހު، އަދި ޚަޒާންދާރަކަށް ޔާމީންގެ ކުރީގެ ޗީފް އޮފް ސްޓާފް އަހްމަދު މުސްތަފާ ވަނީ ހޮވައިފައެވެ.

މި ތިން ބޭފުޅުންގެ އިތުރުން ޕީއެންއެފްގެ ވަގުތީ ސެނެޓުގައި ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު ވެސް ހިމެނިވަޑައިގަންނަވައެވެ.