ސައުދީ އަރަބިއްޔާ އާއި ތުރުކީން ވަނީ ހަކަތައާއި އިންވެސްޓްމަންޓްތަކާއި ދިފާއީ ދާއިރާ ފަދަ ގިނަ ދާއިރާތަކުން އެއްބަސްވުމުގައި ސޮއިކޮށްފައިވާ ކަމަށް ސައުދީ ދައުލަތުގެ ނޫސް އެޖެންސީ އެސްޕީއޭ އިން ބުނެފި އެވެ.

ދެގައުމުގެ ދެމެދުގައި ވެވުނު އެއްބަސްވުންތަކުގައި ސޮއިކުރުމުގެ ރަސްމިއްޔާތުން ތުރުކީގެ ރައީސް ޠައްޔިބު އުރުދުޣާން އާއި ސައުދީގެ ވަލީއަހުދު މުހައްމަދު ބިން ސަލްމާން ފެނިވަޑައިގެންނެވި ކަމަށް އެސްޕީއޭއިން ބުނެއެވެ.

ސައުދީ އަރަބިއްޔާއިން ތުރުކީގެ ޑިފެންސް ފާމް ބައިކާރާ އެކު ޑްރޯން ގަތުމަށް ދެ ކޮންޓްރެކްޓެއްގައި ސޮއިކުރީ "ކިންގްޑަމްގެ ހަތިޔާރު އެޅި ސިފައިންގެ ތައްޔާރީ އިތުރުކޮށް، ދިފާއީ އަދި އުފެއްދުންތެރިކަމުގެ ގާބިލްކަން އިތުރުކުރުމުގެ މަގުސަދުގައި" ކަމަށް ސައުދީގެ ޑިފެންސް މިނިސްޓަރު ޕްރިންސް ޚާލިދު ބިން ސަލްމާން، ކުރެއްވި ޓްވީޓެއްގައި ވިދާޅުވިއެވެ.

Advertisement

އަދި ޑިފެންސް ކޯޕަރޭޝަން ޕްލޭނެއްގައި ވެސް ދެގައުމުން ސޮއިކޮށްފައިވާ ކަމަށް މިނިސްޓަރު އިތުރަށް ވިދާޅުވި އެވެ.

ހޯމަ ދުވަހުގެ ރޭ ދަންވަރު އުރުދުޣާން ވަލީއަހުދުއާ ބައްދަލުކުރެއްވި ކަމަށް އެސްޕީއޭއިން އިތުރަށް ބުނެފައިވެ އެވެ.

ތުރުކީން ބަޖެޓުގެ ދަތިތަކާއި ދިގު މުއްދަތަކަށް އިންފްލޭޝަން އަދި ބަލިކަށިވަމުން އަންނަ ފައިސާއަށް ލުއި ދިނުމަށް މަސައްކަތް ކުރަމުންދާއިރު އިންވެސްޓްމަންޓާއި ފައިނޭންސް އަށް "ބޮޑު އުންމީދެއް" ކޮށްގެން ގަލްފްގެ ގައުމް ތަކަށް މި ކުރާ ދަތުރުގެ ފުރަތަމަ މަންޒިލަކީ ސައުދީ އަރަބިއްޔާއެވެ.

ގަތަރާއި ޔުނައިޓެޑް އަރަބް އެމިރޭޓްސް ވެސް ހިމެނޭހެން އުރުދުޣާންގެ ގަލްފް ދަތުރު ނިންމަން ހަމަޖެހިފައިވަނީ މިމަހުގެ 19 ވަނަ ދުވަހު އެވެ.