ސްޓޫޑެންޓް ލޯނަށް ޝަރުތު ހަމަވާ ހުރިހާ ދަރިވަރުންނަށް ލޯނުދޫކުރުމަށް ސަރުކާރުން ނިންމައިފިއެވެ.

"އަހާ" ފޯރަމްގައި ހަޔަރ އެޑިއުކޭޝަން މިނިސްޓަރ ޑރ. މަރްޔަމް މާރިޔާ ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަމާޒަކީ ސްޓޫޑެންޓް ލޯނުގެ ކަންކަން ވީހާވެސް ފަސޭހަކޮށްދީ، މަތީ ތައުލީމަށް ކިޔަވަން ބޭނުންވާ ދަރިވަރުންނަށް ހުރި ދަތިތަކަށް ހައްލު ހޯދައި ދިނުން ކަމަށެވެ.

މި ލޯނު ސްކީމްގެ ދަށުން އެ ދަރިވަރަކު ބޭނުން ގައުމަކަށް ކިޔަވަން ދެވޭނެއެވެ. އަދި މި ލޯނު ނަގައިގެން ކިޔެވުމުގެ ފުރުސަތު ދެނީ ރާއްޖެއަށް އެންމެ ބޭނުންވާ ދާއިރާތަކަށް ހާއްސަކޮށްގެންނެވެ.

Advertisement

އެގޮތުން ރައީސުލްޖުމްހޫރިއްޔާގެ މެނިފެސްޓޯގައި ހިމެނޭގޮތަށް އިމާރާތް ކުރުމުގެ ދާއިރާއާއި އޭވިއޭޝަންގެ ދާއިރާއާއި ދަނޑުވެރިކަމުގެ ދާއިރާގެ އިތުރުން ގައުމަށް ކޮންމެހެން ބޭނުންވާ ދާއިރާތަކަށް ހާއްސަކޮށްފައިވާކަަމަށް މިނިސްޓަރ ވިދާޅުވިއެވެ.

މީގެ އިތުރުން މިފަހަރުގެ ލޯން ސްކީމްގައި ވެސް ނުކުޅެދުންތެރިކަން ހުންނަ ކުދިންނަށް ޖާގަތަކެއް ވަނީ ހާއްސަކޮށްފައެވެ.

އެކުދިންގެ ހާލަތަށް ރިޢާޔަތްކޮށް ކޯސް ފުރިހަމަ ކުރުމަށް ބޭނުންވާ ހަރަދުތައް ދިނުމަށް ސަރުކާރުން ވަނީ ނިންމާފައެވެ. އަދި މިހާރުވެސް ކޯހުގައި ކިޔަވަމުންދާ ދަރިވަރުން ކުރަންޖެހޭ އެހެނިހެން ހަރަދުތައް ކުރުމަށްވެސް މިފަހަރުގެ ލޯން ސްކީމްގެ ތެރެއިން ފުރުސަތު ލިބިގެން ދާނެ ކަމަށާއި ހިލޭ ޑިގްރީގައި ކިޔަވަމުންދާ ދަރިވަރުންވެސް އިތުރު ހަރަދުތައް ހަމަޖެއްސުމަށް ލޯނަށް އެދެވޭނެއެވެ.

މި ސަރުކާރުން ސްޓޫޑެންޓް ލޯނަށް ކުރުމަތިލުމަށް ހުޅުވާލާފައިވަނީ މިިދޔަ ފެބްރުއަރީ މަހުގެ 29 ވަނަ ދުވަހުއެވެ. އަދި މި މަހުގެ 25ގެ ނިޔަލަށް މުއްދަތް ހަމަވާ ގޮތަށް ހުޅުވާލީ ސްޓޫޑަންޓް ލޯނަށް އެދި ހުށަހެޅުމުގެ މުއްދަތު ވަނީ އަންނަ މަހުގެ 2 ވަނަ ދުވަހާ ހަމައަށް އިތުރުކޮށްފައެވެ.

އެ ސްކީމްގެ ދަށުން ލޯނަސް ހުޅުވާލާފައި ވަނީ ޑިޕްލޮމާއިން ފެށިގެން ޕީއެޗްޑީއާ ހަމައަށް ކިޔަވައިދޭން 500 ފުރުސަތެވެ.