ށ. ފުނަދޫގައި ސިހުރު ހެދިކަމަށް ތުހުމަތުކުރެވޭ މީހަކު ހައްޔަރުކޮށްފިއެވެ.

ފުލުހުން ބުނީ އެއީ އުމުރުން60 އަހަރުގެ ދިވެހި ފިރިހެނެއް ކަމަށެވެ. އަދި އޭނާ ފުލުހުންގެ ބެލުމުގެ ދަށަށް ގެނައީ މިއަދު ކަމަށެވެ.

އެ މައްސަލަ ތަހުގީގު ކުރަމުން ގެންދާ ކަމަށް ބުނެ، އިތުރު ތަފްސީލެއް ހާމައެއް ނުކުރެއެވެ.

Advertisement

ރާއްޖޭގެ ބައެއް ނޫސްތަކުގައި ބުނެފައިވާ ގޮތުގައި އެއީ މިއަހަރު ބޭއްވި މަޖިލިސް އިންތިހާބުގެ ފުނަދޫ ދާއިރާގެ އިންތިހާބީ މެންބަރު، މުހައްމަދު މަމްދޫހް (މަންޑޭ) އަށް ހަދާފައިވާ ސިހުރު ކަމަށެވެ.

ސިހުރު ހަދާފައި ވަނީ މިދިޔަ ބުދަ ދުވަހުގެ ރޭ ކަމަށާއި އެ ރެއަކީ މަމްދޫހު އިންތިހާބުވުމާ ގުޅިގެން އުފާ ފާޅުކުރި ރޭ ކަމަށް ވެސް ބައެއް ނޫސްތަކުގައި ވެއެވެ. އަދި 'ކަބީލާ ލޮއި' ގައި މަމްދޫހުގެ ނަމާއި ގުރުއާންގެ އާޔަތްތައް ލިޔެ ރަށުގެ އެކި ސަރަހައްދުތަކުގައި ހުރި ގަސްގަހަށް ޖަހާފައިވާ ކަމަށް ވެސް ބުނެއެވެ.

މީސްމީޑިއާގައި ދައުރުވަމުންދާ ފޮޓޯތަކުން ވެސް އެ ލޮއިތައް ގަސްގަހަށް ޖަހާފައިހުއްޓައި ފެންނައިއިރު. އެކަން ކުރަނިކޮށް އެ ރަށުގެ ބައެއް މީހުންނަށް ފެނިފައިވާ ކަމަށް ބުނެއެވެ.

މި މައްސަލއާ ގުޅިގެން މަމްދޫހުގެ ސަޕޯޓަރުން ވަނީ އެ ރަށުގެ މަގުތަކަށް ނުކުމެ އިހުތިޖާޖު ވެސް ކޮށްފައެވެ.