ފަލަސްތީނުގެ ދިފާއުގައި ކޮންމެ ދިވެއްސަކު ވެސް އަޑު އުފުލަން ޖެހޭނެކަމަށް ހައުސިންގ މިނިސްޓަރ ޑރ. އަލީ ހައިދަރު ވިދާޅުވެއްޖެއެވެ.

އެސްއެމް ނިއުސްއަށް ދެއްވި އިންޓަވިއުއެއްގައި މިނިސްޓަރ ވިދާޅުވީ ރާއްޖޭގެ ފަރާތުން ފަލަސްތީނުގެ ދިފާއުގައި ވާހަކަދެއްކުމުގެ ފުރުޞަތު ދެއްވީތީ ޚާރިޖީ ވުޒާރާއަށް ޝުކުރު އަދާކުރައްވާ ކަމަށެވެ. އަދި އެ ބަޔާން ދެއްވުމަށް ދެއްވި ދައުވަތު ގަބޫލުކުރެއްވީ ފަލަސްތީނުގެ ދިފާއުގައި ވާހަކަދެއްކުމަކީ ކޮންމެ ދިވެއްސެއްގެ ވެސް ވާޖިބެއް ކަމުގައި ދެކިގެން ކަމަށެވެ.

އިސްރާއީލުގެ މަންދޫބުގެ ފަހުން ދިވެހި ސަރުކާރުގެ ބަޔާން އދ. ގެ އާންމު މަޖިލީހުގައި އިއްވުމުގެ ފުރުޞަތު ލިބިގެންދިއުމަކީ ލިބިވަޑައިގެންނެވި އިތުރު ބާރެއް ކަމަށް ވެސް މިނިސްޓަރ ވިދާޅުވިއެވެ.

Advertisement

އދ. ގެ އާންމު މަޖިލީހުގައި ޑރ. ޙައިދަރު ވަނީ ފަލަސްތީނަށް ޙައްގު ހޯދައިދިނުމަށް ދުނިޔޭގެ އެތައް ޤައުމެއްގައި އެތައް ބަޔަކު އިއްވަމުންދާ އަޑު އެންމެ ވޯޓަކުން ކަނޑުވާލުމަކީ ލަދުވެތި ކަމެއް ކަމަށް ވިދާޅުވެފައެވެ. އަދި ފަލަސްތީނަށް ޙައްގު ހޯދައިދިނުމަށް އދ. ގެ ސަލާމަތީ މަޖިލިސް ނުކުޅެދިފައިވާކަން ފާހަގަކޮށް ވީޓޯ އުވާލަން ޖެހޭ ކަމަށް ވެސް ވިދާޅުވިއެވެ.

އދ. ގެ އާންމު މަޖިލީހުގައި މި މަހުގެ އެއްވަނަ ދުވަހު ދިވެހި ރާއްޖޭގެ ފަރާތުން އިއްވެވި ބަޔާނާ ގުޅިގެން ގިނަބަޔަކުވަނީ ސަރުކާރުގެ ސްޓޭންޑަށާއި ވަޒީރަށް ތައުރީފުކޮށްފައެވެ.