ރަޝިޔާގެ ރައީސް ވްލަޑިމިއާ ޕޫޓިން ފަސް ވަނަ ދައުރަކަށް ހުވާ ކުރެއްވީ މިދިޔަ އަންގާރަ ދުވަހު އެވެ. މި ދައުރު 2030 ވަނަ އަހަރުގެ ނިޔަލަށް ކުރިއަށްދާނެ އެވެ.

ޕުޓިން ވެރިކަމުގެ ހުވާ ކުރެއްވީ ކްރެމްލިންގައި ބޭއްވި ރަސްމިއްޔާތެއްގައެވެ.

އޭނާ ޔޫކްރޭންގައި ތިބި ރަޝިޔާ ސިފައިންނަށް ޝުކުރު އަދާކުރައްވައި ވިދާޅުވީ "އަޅުގަނޑުމެން މިތިބީ އެއްބައިވަންތަ އަދި ބޮޑު ގައުމެއްގެ ގޮތުގައި. އެކުގައި ހުރިހާ ހުރަސްތަކެއް އަރައިގަނެ، އަޅުގަނޑުމެން ވިސްނާ ހުރިހާ ކަމެއް ހަގީގަތަކަށް ވާނެކަން ކަށަވަރުކޮށް އެކުގައި އަޅުގަނޑުމެން ކާމިޔާބު ހޯދާނަން!"

Advertisement

މަރާލާފައިވާ ރަޝިޔާގެ އިދިކޮޅު ލީޑަރު ނަވަލްނީގެ އަނބިކަބަލުން ޔޫލިއާ ވަނީ ސޯޝަލް މީޑިއާގައި މެސެޖެއް އާންމުކޮށްފައެވެ.

ޔޫލިއާ ނަވަލްނާޔާ ބުނީ "އަހަރެމެންގެ ގައުމު މިވަގުތު ލީޑް ކުރަމުންދަނީ ދޮގުވެރިއަކާއި ވަގަކާއި ގަތުލުވެރިއަކު ނަމަވެސް މިކަން ނިމުމަކަށް އަންނާނެ. ދޫނުދޭ. ހަގީގަތް ކުރިއަރާނެ" ކަމަށެވެ.

ޕޫޓިން ވަނީ ކުރީގެ ސޯވިއެޓް ޖުމްހޫރިއްޔާތަކުގެ ލީޑަރުންނާއެކު ސުޕްރީމް ޔޫރޭޝިއަން އިކޮނޮމިކް ކައުންސިލްގެ ބައްދަލުވުމެއް އަންނަ ބުދަ ދުވަހު ބޭއްވުމަށް ހަމަޖެހިފައެވެ.

އަދި ދެވަނަ ބޮޑު ހަނގުރާމައިގައި ކުރީގެ ސޯވިއެޓް ޔޫނިއަން އިން ނާޒީ ޖަރުމަނުގެ މައްޗަށް ހޯދި ކާމިޔާބީގެ ހަނދާނުގައި ބުރާސްފަތި ދުވަހު ބާއްވާ ނަޞްރުގެ ދުވަހުގެ ރަސްމިއްޔާތުގައި ވެސް ބައިވެރިވެވަޑައިގަންނަވާނެ އެވެ.

މޮސްކޯއިން ޔޫކްރޭނަށް އަރައިގަތުމާ ގުޅިގެން ހުޅަނގުގެ ގައުމުތަކާ ދެމެދު އޮތް ގުޅުން ހީނަރުވަމުންދާ ދަނޑިވަޅެއްގައި އެކުވެރި ގައުމުތަކާ އެކު ރަޝިޔާއިން ކުރާ އެއްބާރުލުމަށް ސަމާލުކަން ދެއްވައި، ގައުމީ އެއްބައިވަންތަކަމަށް ބާރުއަޅުއްވާނެ ކަމަށް ބެލެވެ އެވެ.