މޯލްޑިވްސް ޕޯޓްސް ލިމިޓެޑުގެ މުވައްޒަފުންނަށް އަމާޒުކޮށްގެން އެމްއެންޑީއެފް ކޯސްޓްގާޑުން ހިންގި "ސެޓިފިކެޓް 1 އިން ޕޯޓް ސެކިއުރިޓީ ޓްރެއިނިންގ" ކޯހުގެ ދަސްވެނިވުމުގެ ރަސްމިއްޔާތު ބާއްވައިފިއެވެ.

ބަންޑާރަކޮށީގައި މިއަދު ބޭއްވި މި ރަސްމިއްޔާތު ޝަރަފުވެރިކޮށްދެއްވައި ވަނަވަނައަށް ހޮވުނު ބައިވެރިންނަށް ޓްރޮފީއާއި ހަނދާނީ ލިޔުން ހަވާލުކޮށްދެއްވީ ކޯސްޓްގާޑްގެ ކޮމަޑާންޓް، ބްރިގޭޑިއަރ ޖެނެރަލް މުޙައްމަދު ސަލީމްއެވެ. މި ރަސްމިއްޔާތުގައިި ކޯހުގެ ބައިވެރިންނަށް ބެޖާއި ހަނދާނީ ލިޔުން ހަވާލުކޮށްދެއްވީ އެމްއެންޑީއެފް ކޯސްޓްގާޑްގެ ޕްރިންސިޕަލް ޑައިރެކްޓަރ، ލެފްޓިނެންޓް ކާނަލް މުޙައްމަދު ރިޒްމީ ވަލީދުއެވެ.

މި ކޯހުގެ މުދައްރިބުންނަށް ހަނދާނީ ލިޔުން ހަވާލުކޮށްދެއްވީ މޯލްޑިވްސް ޕޯޓްސް ލިމިޓެޑުގެ ޑެޕިއުޓީ ޗީފް އެގްޒެކްޓިވް އޮފިސަރ، ޢަލީ ހާޝިމްއެވެ.

Advertisement

ސީ ޕޯޓް ސެކިއުރިޓީގައި މަސައްކަތްކުރާ ފަރާތްތަކަށް ބޭނުންވާ ހުނަރާއި ޢިލްމު އުނގަންނައިދީ ހަރުދަނާ ސެކިއުރިޓީ އޮފިސަރުން އުފެއްދުމުގެ މަޤްޞަދުގައި ކުރިއަށްގެންދިޔަ މި ތަމްރީނު ޕްރޮގްރާމްގައި މޯލްޑިވްސް ޕޯޓްސް ލިމިޓެޑުގެ 18 މުވައްޒަފުން ބައިވެރިވެ، ކޯސް ފުރިހަމަކޮށްފައިވެއެވެ. 2023 ވަނަ އަހަރު ނޮވެންބަރު 4 ވަނަ ދުވަހުން ފެށިގެން އެއްމަސް ދުވަހަށް ހިންގި މި ޕްރޮގްރާމަކީ އެމްޕީއެލްގެ މުވައްޒަފުންނަށް ހިންގި މީގެ ދެވަނަ ޕްރޮގްރާމެވެ.

މީގެ ޕުރަތަމަ ޕްރޮގްރާމް ހިންގާފައިވަނީ 2020 ވަނަ އަހަރުއެވެ.

މި ކޯސް ނިންމުމުގެ ގޮތުން ބޭއްވި ރަސްމިއްޔާތުގައި، އެމްއެންޑީއެފް ކޯސްޓްގާޑްގެ އިސް އޮފިސަރުންނާއި، އެމްޕީއެލްގެ އިސްވެރިންގެ އިތުރުން ކޯހުގެ މުދައްރިބުން ބައިވެރިވެލެއްވިއެވެ.