ހުޅުމާލޭ ވެހިކަލެއްގައި މަރުވެފައި އޮތް މީހާގެ މަރުގައި ތުހުމަތުކުރެވޭ ކަމެއް ނެތް ކަމުގައި ފުލުހުން ބުނެފިއެވެ.

ފުލުހުން ބުނީ ހުޅުމާލޭގައި އިއްޔެ ވެހިކަލެއްގެތެރެއިން ފެނުނު މީހާގެ މަރުގައި ތުހުމަތު ކުރެވޭ ފަދަ އެއްވެސް ކަމެއް ފާހަގަވެފައި ނުވާ ކަމަށެވެ.

ހުޅުމާލޭގައި ވޭނެއްގެ ތެރޭގައި މަރުވެފައި އޮއްވާ އިއްޔެ ފެނުނީ ބަންގްލަދޭޝްއަށް ނިސްބަތްވާ ފިރިހެނެކެވެ.

Advertisement

އެ ވޭންގެ ތެރޭގައި ޚަބަރު ހުސްވެފައި އޮތް މީހާ އިއްޔެ ފެނިގެން އެމީހާ ވަނީ ހުޅުމާޅެ ހޮސްޕިޓާލަށް ގެންގޮސްފައެވެ. ހޮސްޕިޓަލަށް ގެންދިޔަ އިރު ވެސް އެމީހާ ވަނީ މަރުވެފައި ކަމަށް ހޮސްޕިޓަލުން ވަނީ ބުނެފައެވެ.

ފުލުހުން ބުނީ، އެ ބިދޭސީ މީހާގެ ހަށިގަނޑާ މެދު ޢަމަލުކުރާނެ ގޮތަކާ މެދު މިހާރު އެމީހާގެ އާއިލާއާ އެކު ވާހަކަ ދައްކަމުން އަންނަ ކަމަށެވެ.

ހުޅުމާލެ ފޭސް 1 ސަހަރާ ކުރިމަތީ މަގުގައި އެ ވެހިކަލް ހެނދުނުއްސުރެން އޮތީ ޕާކުކޮށްފައެވެ. ވޭނުގެ ތެރޭގައި މީހަކު މަރުވެފައި އޮތްކަން އެނގުނީ އަސުރު ނަމާދު ފަހުންނެވެ.