ކަރޯކޭ ޗެލެންޖު ބާއްވާތީ ނުރުހުން ފާޅުކޮށް ސަރުކާރަށް، އަލީ ރަމީޒު ފާޑުކިޔައިފިއެވެ.

ޖަމިއްޔަތުއް ސަލަފުގެ އޮޕަރޭޝަންސް މެނޭޖަރު ޢަލީ ރަމީޒު އެކްސް ގައި ބުނީ މާތް ރަސްކަލާނގެ ހަރާމްކުރައްވާފައިވާ ކަމެއް ރާވައި، ހިންގުން ބަލައެއް ނުގަނެވޭނެ ކަމަށެވެ.

މި ކަރޯކޭ ޗެލެންޖަކީ ޔޫތް މިނިސްޓްރީން އިންތިޒާމުކޮށް، ޒުވާނުންނަށް އަމާޒުކޮށްގެން ބާއްވާ ޗެލެންޖެކެވެ.

Advertisement

މިކަމާ ނުރުހުން ފާޅުކޮށް ޢަލީ ރަމީޒު ބުނީ ޒުވާނުން ވިޔަސް އަދި އެނޫން ގިންތިއަކަށް ވިޔަސް، މާތްރަަސްކަލާނގެ ހަރާމްކުރެއްވި ކަމެއް ރާވައި އިންތިޒާމު ކުރުން ބަލައެއް ނުގަނެވޭނެ ކަމަށެވެ.

ޢަލީ ރަމީޒަކީ އިސްލާމް ދީނާއި ޚިލާފު މިފަދަ ކަންކަމުގައި އަބަދު ވެސް ފާޅުކަން ބޮޑުގޮތެއްގައި ޝުއޫރު ފާޅުކުރައްވާ ފަރާތެކެވެ.

ޢަލީ ރަމީޒުގެ އިތުރުން ރާއްޖޭގެ ދީނީ ބައެއް އެހެން ޢިލްމުވެރިން ވެސް އެކި ޕްލެޓްފޯމުތަކުގައި އަންނަނީ ޔޫތް މިނިސްޓްރީން ބޭއްވުމަށް ނިންމާފައިވާ ކަރޯކޭ ޗެލެންޖާމެދު ހިތްހަމަނުޖެހުން ފާޅުކުރަވަމުންނެވެ. އަދި ތަފާތު ޝުއޫރުތައް ވެސް ދަނީ ފާޅުކުރަމުންނެވެ.

ޔޫތް މިނިސްޓްރީން ވަނީ 2024 ވަނަ އަހަރު ފެށުމުގެ ގޮތުން ވެސް މިއުޒިކް ޝޯވއެއް ބޭއްވުމަށް ނިންމާފައެވެ. ނަމަވެސް އަލީ ރަމީޒުގެ ޓްވީޓަކާއި އެހެން ބައެއް ދީނީ އިލްމުވެރިންގެ ހިތްހަމަނުޖެހުމާއެކު އެ ޝޯވ ވަނީ ކެންސަލްކޮށްފައެވެ.