ބަހާ މިނިސްޓްރީގެ ޑެޕިއުޓީ މިނިސްޓަރެއްގެ މަގާމުގައި ހުންނެވި ކުރީގެ ނޫސްވެރިޔާ މުހައްމަދު ސައީދު މޫސާ ވަޖުދީ މަގާމުން ސަސްޕެންޑްކޮށްފި އެވެ.

އެނގިފައިވާ ގޮތުގައި އޭނަ ސަސްޕެންޑްކުރީ ބަލަމުން އަންނަ ސުލޫކީ މައްސަލައަކާ ގުޅިގެންނެވެ. އައްޑު އަށް ނިސްބަތްވާ ވަޖުދީ އަކީ ކުރީގެ "ހަވީރު" ނޫހުގައި ވަރަށް ގިނަ ދުވަސްތަކެއް ވަންދެން މަސައްކަތްކުރެއްވި ރާއްޖޭގެ ވަރަށް ތަޖުރިބާކާރު ނޫސްވެރިއެކެވެ.

ވަޖުދީ ސަސްޕެންޑްކުރި އިރު، ސްޕޯޓްސް މިނިސްޓްރީގެ ޑެޕިއުޓީ މިނިސްޓަރެއްގެ މަގާމުގައި ހުންނެވި ހުސައިން ޝިފާޒު ވެސް މި ހަފުތާގައި ސަސްޕެންޑްކޮށްފައިވެ އެވެ.މި ސަރުކާރުން ސަސްޕެންޑްކޮށްފައިވާ ޑެޕިއުޓީ މިނިސްޓަރުންގެ ތެރޭގައި އިންޑިއާގެ ބޮޑުވަޒީރު ނަރެންދުރަ މޯދީ އަށް މަލާމާތްކޮށް ސޯޝަލް މީޑިއާގެ ފުރައްސާރަކުރި މައްސަލައިގައި ސަސްޕެންޑްކުރި ޔޫތު މިނިސްޓްރީގެ ޑެޕިއުޓީ މިނިސްޓަރުން ކަމަށްވާ މަލްޝާ ޝަރީފާއި މަރިޔަމް ޝިއުނާގެ އިތުރުން މަހުޒޫމް މާޖިދު ހިމެނެ އެވެ.

Advertisement