ދިވެހިން އަބަދު ވެސް ފަލަސްތީނާ އެކީ ތިބިކަން ހާމަކޮށް ދިނުމުގެ ގޮތުން ރާއްޖޭގެ ވެރިރަށް މާލޭގެ މަގަކަށް ފަލަސްތީނާ ގުުވައިގެން ނަން ދޭން ނިންމާފައިވާތީ އެކަމަށް މަރުހަބާ ވިދާޅުވެ، ނަން ދޭން ވާނީ މާލޭގެ ބޮޑު މަގަކަށް ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެ އެވެ.

އެ މަނިކުފާނު މިއަދު ސޯޝަލް މީޑިއާ ޕޯސްޓެއްގައި ވިދާޅުވީ ފަލަސްތީނާ ގުޅުވައިގެން މާލޭގެ މަގަކަށް ނަން ކިޔުމަކީ ވަރަށް ފެންނަ ކަމެއް ކަމަށާއި އަދި އެ ނަން ކިޔަން ވާނީ އެކަށީގެންވާ ބޮޑު މަގަކަށް ކަމަށެވެ.

އިޒްރޭލުން މިހާރު ފަލަސްތީންގެ ރައްޔިތުންނާ މެދު ހިންގަމުންދާ ލާއިންސާނީ ޖަރިމާމަތަކާ ގުޅިގެން ފަލަސްތީނަށް އޮތް ތާއީދު ހާމަކޮށް ދިނުމަށްޓަކައި މާލޭގެ ކޮންމެވެސް މަގަކަށް ފަލަސްތީނުގެ ނަމާ ގުޅުވައިގެން ނަން ދިނުމަށް މާލެ ސިޓީ ކައުންސިލުން ނިންމީ އިއްޔެ އެވެ.

Advertisement

އެގޮތަށް ހުށަހެޅުއްވީ މޭޔަރު އާދަމް އާޒިމެވެ. އޭނަ ވިދާޅުވީ މާލޭގައި ނަމެއް ނުދީ އޮތް ދެތިން މަގެއް އޮތުމުން، އޭގެ ތެރެއިން ކޮންމެވެސް މަގަކަށް ފަލަސްތީނުގެ ނަމާ ގުޅުވައިގެން ނަން ދެވިދާނެ ކަމަށެވެ. އެގޮތުން ޖަލްސާގައި ބައިވެރިވެ ވަޑައިގަތް ގިނަ މެމްބަރުން އާޒިމްގެ އެ ހުށަހެޅުއްވުމަށް ތާއީދު ކުރެއްވި އެވެ.

އެކަމަކު ފަލަސްތީނާ ގުޅުވައިގެން ނަން ދޭނީ ކޮން މަގަކަށް ކަމާއި އެކަން ކުރާނެ އިރެއް ކައުންސިލުން އަދި ހާމައެއްނުކުރެ އެވެ.