ފަލަސްތީނާ ދެކޮޅަށް އިޒްރޭލުން ހިންގަމުންދާ ޖަރީމާތަކާ ގުޅިގެން އެ ގައުމަށް ދަތިކުރަން މިހާތަނަށް 15 ގައުމަކުން އިޒްރޭލުގެ ޕާސްޕޯޓް މަނާކޮށްފި އެވެ.

މި ލިސްޓަށް އެންމެ ފަހުން އިތުރުވި ގައުމަކީ ރާއްޖެ އެެވެ. އެ ގައުމުގެ ޓޫރިސްޓުން ރާއްޖެ އެތެރެވުން ހުއްޓުވަން އިޒުރޭލު ޕާސްޕޯޓް މަނާކުރަން ނިންމިކަން ސަރުކާރުން ރަސްމީކޮށް އިއުލާންކުރީ މި މަހުގެ 2 ވަނަ ދުވަހު އެވެ. ރާއްޖޭގެ މި ނިންމުމާ އެކީ އިޒްރޭލު ސަރުކާރުން ވަނީ ރާއްޖޭގައި ތިބި އެ ގައުމުގެ ޓޫރިސްޓުން ފައިބަން ވެސް އަންގައިފަ އެވެ.

އިޒްރޭލުގެ ޕާސްޕޯޓް މަނާކުރި ގައުމުތަކުގެ ތެރޭގައި ދެން ހިމެނެނީ ސައުދީ އަރަބިއްޔާ، ލީބިއާ، އިރާން، އިރާގު، ލުބުނާން، ކުވައިތު، ބަހްރެއިން، ބުރުނާއީ، ސީރިއާ، ޔަމަން، އަލްޖީރިއާ، އޮމާން، ޕާކިސްތާން، ބަންގްލަދޭޝް އަދި މެލޭޝިއާ އެވެ. މި ގައުމުތަކަށް ބަލާ އިރު ގިނައީ މެދުއިރުމަތީގެ ގައުމުތަކެވެ.

Advertisement

މިދިޔަ އަހަރުގެ އޮކްޓޯބަރު މަހުގެ 7 އިން ފެށިގެން އިޒްރޭލުން ފަލަސްތީނާ ދެކޮޅަށް ހިންގަމުންދާ ލާއިންސާނީ ޖަރީމާތަކުގައި މިހާތަނަށް 35،000 އަށް ވުރެ ގިނަ މީހުން ޝަހީދުކޮށްފައިވެ އެވެ. ޔަހޫދީންގެ މި އަނިޔާވެރިކަމާ ގުޅިގެން އެ ގައުމާއި އެތަނަށް ވާގިދޭ ގައުމުތަކުގެ އުފެއްދުންތައް ވެސް ދުނިޔޭގެ ބައެއް ހިސާބުތަކުގައި ބޮއިކޮޓްކޮށްފައިވެ އެވެ.