އިރާންގެ ރައީސްގެ މަގާމަށް 6 ކެންޑިޑޭޓެއްގެ ނަން ފާސްކޮށްފިއެވެ.

އިރާންގެ އާ ރައީސް އިންތިހާބު ކުރުމަށް ބާއްވާ އިންތިހާބު ކުރިއަށް ގެންދިއުމަށް ހަމަޖެހިފައިވަނީ ޖޫން 28 ގައެވެ.

މި އިންތިހާބުގައި ވާދަކުރުމަށް 80 ކެންޑިޑޭޓަކު ނަން ހުށަހެޅިއެވެ. އެހެންނަމަވެސް ކެންޑިޑޭޓުންގެ ޝަރުތުހަމަވޭތޯ ކަނޑައެޅުމަށް ހާއްސަކޮށްފައިވާ "ގާޑިއަން ކައުންސިލް"އިން ފާސްކޮށްފައިވަނީ ހަ ކެންޑިޑޭޓެއްގެ ނަމެވެ. ބާކީ 74 ކެންޑިޑޭޓުންގެ ނަން އެ ކައުންސިލުން ވަނީ އެކި ސަބަބުތަކާހެދި ޑިސްކޮލިފައި ކޮށްފައެވެ.

Advertisement

އިރާންގެ ރައީސްގެ އިންތިހާބަށް ވާދަކުރަން ފާސްކުރި 6 ކެންޑިޑޭޓުންގެ ތެރޭގައި އެ ޤައުމުގެ ނިއުކްލިއާ މަޝްވަރާތަކުގެ ކުރީގެ އިސްވެރިޔާ ސައީދް ޖަލީލް، ތެހްރާންގެ މޭޔަރު އަލީރެޒާ ޒަކާނީ، އެ ގައުމުގެ ގާނޫނުހަދާ މަޖިލީހުގެ ރައީސް މުހައްމަދު ބާގިރު ގަލިބާފް، ކުރީގެ އިންޓީރިއާ އަދި ޖަސްޓިސް މިނިސްޓަރު މުސްތަފާ މުހައްމަދީ ފާހަގަކޮށްލެވެއެވެ.

މި އިންތިހާބަށް އެ ގައުމުގެ ކުރީގެ ރައީސް މަހުމޫދު އަހުމަދީނިޖާދު ވާދަކުރެއްވިނަމަވެސް އޭނާގެ ނަންވެސް ވަނީ ޑިސްކޮލިފައި ކޮށްފައެވެ.

އީރާނުގެ ރައީސް އިބްރާހީމް ރައީސީ ދަތުރުކުރައްވަމުން ގެންދެވި ހެލިކޮޕްޓަރު ވެއްޓުނު ހާދިސާގައި ރައީސީ ވަނީ އަވަހާރަވެފައެވެ. މިއާއެކު މިހާރު އިރާނުގެ ރައީސްގެ މަގާމާ ހަވާލުވެފައިވަނީ ނައިބުރައީސް މުހައްމަދު މޮޚްބެރްއެވެ. އިރާނުގެ ޤާނޫނުއަސާސީ ބުނާގޮތުން މިފަދަ ހާލަތެއް މެދުވެރިވެއްޖެނަމަ 50 ދުވަހުގެ ތެރޭގައި އިންތިހާބު ބާއްވަންޖެހެއެވެ.

ހެލިކޮޕްޓަރު ވެއްޓުނު ހާދިސާގައި އީރާނުގެ ރައީސް އިބްރާހީމް ރައީސީގެ އިތުރުން ފޮރިން މިނިސްޓަރު ހުސައިން އަމީރު އަބްދުالله ހައިންވެސް ވަނީ އަވަހާރަވެފައެވެ. އިރާނުގެ މީޑިއާތަކުން ރިޕޯޓުކޮށްފައިވާ ގޮތުގައި އެކްސިޑެންޓު ހިނގީ ރައީސީ، އެގައުމުގެ އަވަށްޓެރި އަޒަރުބައިޖާނަށް ކުރެއްވި ދަތުރުފުޅަށްފަހު އެނބުރި ގައުމަށް ވަޑައިގެންނެވި މަގުމަތީގައެވެ.