ފުރާންސްގެ ޕީއެސްޖީއިން އަންނަ ސީޒަނަށް ތައްޔާރު ވުމުގެ ގޮތުން ޖަޕާނަށް ދާ ދަތުރުގައި އެކުލަބުގެ ފޯވާޑް ކިލިއަން އެމްބާޕޭ ސްކޮޑުން ބާކީ ކޮށްފިއެވެ.

މީޑިޔާ ރިޕޯޓުތަށް ބުނާ ގޮތުން ޕީއެސްޖީއިން އަންނަ ސީޒަނުގެ ޓީމުގެ ޕުލޭނުގައި އެމްބާޕޭ ނުހިމަނަން ވަނީ ނިންމާފައެވެ. އަދި މިހާރު އެކުލަބުން ވިސްނުން ހުރީ އެމްބާޕޭ ވިއްކާލުމަށް ކަމުގައިވެސް މީޑިޔާ ރިޕޯޓުތަށް ބުނެއެވެ.

ޕީއެސްޖީގެ ފުޓްބޯޅަ ތަރި ކިލިއަން އެމްބާޕޭ އެ ކުލަބާ އެކު މަޑު ކުރުމާ ދޭތެރޭގައި ގޮތް ނިންމަން ބާކީ އޮތީ ދެ ހަފްތާ ކަމަށް ޕީއެސްޖީގެ ޗެއާމަން ނާސިރް އަލް ޚެލާފީ ވަނީ މިމަހުގެ 5ވަނަ ދުވަހު ވިދާޅުވެފައެވެ. ނާސިރް ވިދާޅުވީ ކްލަބަށް ވުރެ ބޮޑަށް އެއްވެސް މީހަކަށް އިސްކަން ނުދެވޭނެ ކަމަށެވެ. އެހެންކަމުން، އެމްބާޕޭގެ ކުރިމަގާ މެދުގައި ގޮތް ނިންމަން ހަފްތާއެއް ނުވަތަ ދެ ހަފްތާގެ މުހުލަތެއް ދީފައިވާ ކަމަށް ނާސިރް ވިދާޅުވިއެވެ.

Advertisement

އެމްބާޕޭގެ ފަރާތުން ގޮތެށް ނުނިންމާއިރު، މެގަޒިންއަކަށް އިންޓަރވިއު އެއް ދެމުން މީގެ ހަފްތާއެއް ކުރިން އެމްބާޕޭ ވަނީ ޕީއެސްޖީ އަށް ފާޑު ކިޔާފައެވެ. އެގޮތުން "ބައިބައިވުން" ބޮޑު ކުލަބަކަށް ކުޅުމުން ލިބޭނެ ފައިދާއެއް ނެއް ކަމުގައިވެސް ވަނީ ބުނެފައެވެ.

"އަހަރެން ފްރާންސް ލީގްގައި މަޑުނުކުރާނެ ކަމަށް ގަބޫލުކުރެވެންވީ ސަބަބުތައް ވަރަށް ސާފު، އަހަރެންނަކީ ވާދަވެރިއެއް، ވީމާ އަހަރެން ކުޅެންޏާ ކުޅޭނީ މޮޅުވާން. އަދި އިތުރަށް ރަނގަޅު ކުރެވޭނެ އޭ ހިތަށް އަރުވަން. އެހެންވެ ކޮންމެ ތަނެއްގައި ކުޅުނަސް، ކޮންމެ ހާލެއްގައި ކޮންމެ ތަނެއްގައިވިޔަސް، މޮޅު ހޯދުމަށް އަހަރެން ފެން ބޮވާ" އެމްބާޕޭ ބުންޏެވެ.

އަންނަ އަހަރުގެ ޖޫންގައި ފްރީ އެޖެންޓްއެއް ގޮތުގައި ކްލަބް ދޫކުރާނެ ކަމުގެ ވާހަކަތައް އުމުރުން 24 އަހަރުގެ ފްރާންސް ގައުމީ ފުޓްބޯޅަ ޓީމްގެ ކެޕްޓަންކަން ކުރަމުންދާ އެމްބާޕޭ ދައްކާފައިވެއެވެ. ރިޕޯތްތައް ބުނާގޮތުންނަމަ، އެމްބާޕޭ ބޭނުންވަނީ ރެއާލް މެޑްރިޑަށް ބަދަލުވާށެވެ. އަދި ރެއާލް އިންވެސް އެމްބާޕޭ ހޯދަން ޝައުގުވެރިކަން ފާޅުކޮށްފައިވެއެވެ.