ރާއްޖެ އަށް ސިއްރުން އެތެރެކުރަން އުޅުނު ތިން މިލިއަނަށް ވުރެ ގިނަ ސިނގިރޭޓް ކަސްޓަމްސް އިން އަތުލައިގެންފި އެވެ.

ކަސްޓަމްސް އިން ބުނީ މިދިޔަ މަހުގެ 19 ގައި އައި މުދަލުގެ ޝިޕްމަންޓެއް 343 ކާޓަންގެ ޕޭޕާ ޓިޝޫ ހިމެނޭ ކަމަށް ޑިކްލެއާކޮށްފައިވާ ކަމަށާއި ނަމަވެސް އެ އިދާރާ އަށް ލިބުނު އިންޓެލިޖެންސް މައުލޫމާތަކާ ގުޅިގެން ހިންގި އޮޕަރޭޝަނެއްގައި މި މަހުގެ 13 ވަނަ ދުވަހު ބަލައި ފާސްކުރި އެ ޝިޕްމެންޓެއްގެ ތެރެއިން 143 ކާޓަންގެ ޕޭޕާ ޓިޝޫއާއި 200 މާސްޓާ ކާޓަންގެ ސިނގިރޭޓު ފެނިފައިވާ ކަމަށެވެ. މި 200 މާސްޓާ ކާޓަންގައި ތިން މިލިއަނަށް ވުރެ ގިނަ ސިނގިރޭޓް ހުރި ކަމަށް ކަސްޓަމްސް އިން ބުނެ އެވެ.

އެ ޝިޕްމަންޓުގައި ހިމެނޭ މުދާތައް ކަސްޓަމްސްއިން ހިފަހައްޓާފައިވާއިރު، އެ އިދާރާ އިން ބުނީ މިއީ ރާއްޖެއަށް ސިއްރުން މުދާ އެތެރެކުރަން އުޅުމުގެ މައްސަލައަކަށްވާތީ މި މައްސަލައިގެ ތަހުގީގު މިހާރު ފަށާފައިވާ ކަމަށެވެ.

Advertisement

ކަސްޓަމްސް އިން ވަނީ ރާއްޖެ އެތެރެކުރެވޭ މުދަލާއި ގުޅޭގޮތުން ކަސްޓަމްސްގެ ގާނޫނު ތަންފީޒު ކުރުމުގައި ފަސްނުޖެހޭނެ ކަމަށްވެސް ބުނެފަ އެވެ.