ޕޯޗްގަލް ނޮކުއައުޓް ބުރުގެ ޖާގަ ކަށަވަރުކުރީ 3-0 ން ތުރުކީ ބަލިކޮށްގެންނެވެ.

މެޗުގައި ޕޯޗްގަލް އިން ލީޑް ނެގީ 21 ވަނަ މިނިޓްގައި ބާނާޑޯ ސިލްވާ ކާމިޔާބުކުރި ލަނޑުންނެވެ. ޕޯޗްގަލްގެ ދެވަނަ ލަނޑަކީ ވަރަށް ފަސޭހައިން ކުޅެވެން އޮތް ބޯޅައެއްގައި ތުރުކީ ޑިފެންޑަރު ސަމެތް އަކެއިދިން އަތުން ބައިކޮޅަށް ވަން ލަނޑެކެވެ. 28 ވަނަ މިނިޓްގައި ބައިކޮޅަށް ލަނޑު ވަނީ ކަންސޭލޯ ރޮނަލްޑޯއަށް ދޭން ކުރިއަށް ޖައްސާލި ބޯޅަ ސަމެތް އަކެއިދިން ފަހަތަށް ކީޕަރަށް ޖައްސާލުމުން ނެވެ. އެބޯޅަ ފަހަތަށް ކުޅުނުއިރު ޕޯޗްގަލްގެ އެއްވެސް ކުޅުންތެރިއަކު ނެތެވެ.

މުޅި މެޗުގެ ސަމާލުކަން އެންމެ ބޮޑުވީ ދެވަނަ ހާފްގައި، މެޗުގެ 56 ވަނަ މިނިޓްގައި ބުރޫނޯ ފެނާންޑޭޒް ޖެހި ޕޯޗްގަލްގެ ތިންވަނަ ލަނޑަށެވެ. އެލަނޑު ޖަހަން ކެޕްޓަން ރޮނަލްޑޯ ފުރުޞަތު ތަނަވަސްކޮށްދިނުން ފުޓްބޯޅައިގެ ތަޖުރިބާކާރު ސިފަކޮށްފައި ވަނީ 'އަމިއްލަ އެދުމެއް ނެތް އެސިސްޓެއް' ގެ ގޮތުގައެވެ.

Advertisement

މިއެސިސްޓާއެކު ރޮނަލްޑޯ ވެފައިވަނީ ޔޫރޯގައި އެންމެ ގިނަ އެސިސްޓްކުރި ކުޅުންތެރިޔާ އަށެވެ. މިއީ ޔޫރޯގައި ރޮނަލްޑޯގެ 8 ވަނަ އެސިސްޓެވެ. އެންމެ ގިނަ ލަނޑު ޔޫރޯގައި ޖެހީވެސް ރޮނަލްޑޯ އެވެ. އެއީ 14 ލަނޑެވެ.

މިގްރޫޕުން ޕޯޗްގަލް ހަ ޕޮއިންޓާއެކު ދެވަނަ ބުރު ޔަގީން ކުރިއިރު ދެވަނައިގައި އޮތީ ތިން ޕޮއިންޓާއެކު ތުރުކީ އެވެ. ޗެކްރިޕަބްލިކާއި ޖޯޖިއާ އޮތީ ޕޮއިންޓަކާ އެކުއެވެ.