ރ. މީދޫގެ މިސްކިތެއްގައި ޓިކްޓޮކް ކުޅުނު ނެށުންތެރިޔާ ސަސްޕެންޑު ކޮށްފިއެވެ.

އެ މިސްކިތުގައި ޓިކްޓޮކް ކުޅުނު އަންހެންމީހާއަކީ "ދަންދާނަ" ގުރޫޕުގެ އަންހެން މެމްބަރެކެވެ.

މިކަމާއިގުޅިގެން އެ ގްރޫޕުން ނެރުނު ބަޔާނެއްގައި ބުނީ އެ ޢަމަލު ހަރުކަށި އިބާރާތުން ކުށްވެރިކުރާ ކަމަށާއި އެއީ އޭނާ އަމިއްލައަށް ކުރި ކަމެއް ކަމަށެވެ. އަދި އެއީ އެ ގުރޫޕާ އެއްވެސް ގުޅުމެއް އޮވެގެން ކުރި ކަމެއް ނޫން ކަމަށް ވެސް އެ ބަޔާނުގައިވެއެވެ.

Advertisement

އެ ގުރޫޕުން ރޭވިފައިވާ އެއްވެސް ދަތުރެއްގައި އެ ގުރޫޕަށް ނިސްބަތްވާ އެއްވެސް މެމްބަރެއްގެ ފަރާތުން އެފަދަ އަމަލެއް ދެން ނުފެންނާނެ ކަމަށް އެ ބަޔާނުގައިވެއެވެ.

ސޯޝަލް މީޑިއާގައި ދައުރުވަމުންދާ ވީޑިއޯގައި ފެންނަނީ އާސާރީ މިސްކިތެއްގެ ތެރޭގައި އާއި ގޯތިތެރޭގައި ބަނޑިޔާ އަދި މާ ކޯޅިއެއް ހިފައިގެން އެ އަންހެން މީހާ ނަށާ ތަނެކެވެ. އެ މިސްކިތަކީ މިހާރު ވެސް އާންމުން ނަމާދު ކުރުމަށް ބޭނުން ކުރާ މިސްކިތެކެވެ. ލިބާހެއް ލައިގެން ހުރި އެ އަންހެން މީހާ ފެން ހުރި ބަނޑިޔާއެއް ހިފައިގެން މިސްކިތުގެ ތެރެއިން ހިނގާފައި ދާ މަންޒަރު ވެސް ފެނެއެވެ.

ފުލުހުން ބުނެފައިވަނީ ޓިކްޓޮކް ހަދައި މިސްކިތުގެ ތެރޭގައި ނެށީ މީދޫގައި އީދު ޝޯ ދިނުމަށް ގޮސް ތިބި ގްރޫޕެއްގެ އަންހެނަކު ކަމަށެވެ. އެ މައްސަލަ މިހާރު ތަހުގީގު ކުރަމުން އަންނަ ކަމަށެވެ.

މި މައްސަލަ ފެންމަތިވުމުން ވީޑިއޯ މިހާރު ވަނީ ޑިލީޓްކޮށްފައެވެ.