ފައިސާ ޗާޕް ކުރުމަކީ އިހްލާސްތެރި މަސައްކަތެއް ނޫން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

"ޕީއެންސީ ހައުސް" ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ ސަރުކާރު ވެރިކަމާއި ހަވާލުވިތާ 7 މަސް ދުވަސްވެފައިވާއިރު، އެއްވެސް ވަރަކަށް ފައިސާ ޗާޕުނުކޮށް، އާމްދަނީ ހޯދައިގެން އެކި ފަރާތްތަކަށް ދައްކަން އޮތް 13 ބިލިއަން ރުފިޔާ ދައްކާ ޚަލާސްކޮށްފައިވާކަމަށެވެ.

މީގެ އިތުރުން އެމަނިކުފާނު އިއުލާންކުރައްވާފައިވާ އިޤްތިޞާދީ އެޖެންޑާގައިވާ ކަންކަން ހާސިލުކުރުމަށް ގިނަ މަސައްކަތްތަކެއް ކުރަމުންދާ ކަމަށާއި އަދި އެކަމުގެ ހެޔޮ ނަތީޖާވެސް ފެންނަމުންދާ ކަމަށް ވިދާޅުވިއެވެ. އެގޮތުން މި ސަރުކާރު ހަވާލުވިތާ 7 މަހާއި ދުވަސްކޮޅެއް ވެފައިވާއިރު، ހާސިކުރި އެންމެ ބޮޑު ކާމިޔާބީއަކީ ފައިސާ ޗާޕުކުރުން ހުއްޓާލުންކަމަށެވެ.

Advertisement

ޑރ. މުހައްމަދު މުއިއްޒު ވިދާޅުވީ ރައްޔިތުންގެ މަޖިލީހުގެ މެޖޯރިޓީ ސަރުކާރަށް ރައްޔިތުން ދީފައިވާ ކަމަށާއި މިހާރު ކުރިއަށްދަނީ ރައްޔިތުން ބޭނުންވާ ތަރައްޤީގެ ހާސިލުކުރުމުގެ މަސައްކަތްކަމަށެވެ. 

ރައީސް ވިދާޅުވީ ކުރީ ސަރުކާރުން ހަރަދުތައް ފޫބައްދަން ފައިސާ ޗާޕުކުރިނަމަވެސް، އެއީ ގައުމަށް އެންމެ ފައިދާ ހުރި ނިންމުން ނޫން ކަމަށެވެ. އަދި އެއީ އިހްލާސްތެރި މަސައްކަތެއްވެސް ނޫންކަމަށެވެ. އަދި ފައިސާ ޗާޕުކުރުން ހުއްޓާލުމުގެ އިތުރުން، ބޮޑެތި ތަކުލީފުތައް ނަގަންޖެހޭ ގޮތަށް ސަރުކާރުން ލޯނު ނެގުންވެސް ހުއްޓާލާފައިވާކަމަށެވެ.