މިސްކިތުގައި ޓިކްޓޮކް ކުޅުނު މީހާ ތައުބާވާންޖެހޭ ކަމުގައި ދީނީ އިލްމުވެރިޔާ ޝައިޚު އަލި ޒައިދު ވިދާޅުވެއްޖެއެވެ.

ޒައިދު އެކްސް ޕޯސްޓެއްގައި ވިދާޅުވީ އެހާ ދަށުދަރަޖައަށް މިމުޖުތަމަޢުގެ ބައެއް މީހުން ވެއްޓުނީތީ ޙައިރާންވާ ކަމަށެވެ. އަދި ބަޔަކު މީހުން ނަމާދުކުރާ ދޮޅިއަޅައިގެން ގަމީސްނުލައި ވައްތަރު ޖައްސާ ވީޑިއޯއެއްވެސް ފެނިއްޖެ ކަމަށެވެ.

އެއީ މަޖާކަމެއް ނޫންކަމަށާއި  މިހުންނަނީ މަޖަލުގެ ނަމުގައި ހިންގޭ ޖަރީމާތައް ކަމަށް ޝައިޚް ވިދާޅުވިއެވެ. އަދި ޒައިދު ވިދާޅުވީ އެކަން ކުރި މީހުން ތައުބާވުން ލާޒިމް ކަމަށެވެ.

Advertisement

ރ. މީދުއަށް ޝޯ ދޭން ގޮސް އުޅުނު ގުރޫޕެއްގެ އަންހެނަކު އެ ރަށުގެ މިސްކިތެއްގެ ތެރޭގައި ޓިކްޓޮކް ކުޅުނު މައްސަލައެއް ފުލުހުން ތަހުގީގުކުރަމުން އަންނައިރު، އެ މައްސަލައިގާ "ދަންދާނަ" ގުރޫޕުން އެ އަންހެން މެމްބަރު ވަނީ ސަސްޕެންޑު ކޮށްފައެވެ.

ދަންދާނަ ގްރޫޕުން ނެރުނު ބަޔާނެއްގައި ބުނީ އަންހެންމީހާގެ އެ އަމަލު ހަރުކަށި އިބާރާތުން ކުށްވެރިކުރާ ކަމަށާއި އެއީ އޭނާ އަމިއްލައަށް ކުރި ކަމެއް ކަމަށެވެ. އަދި އެއީ އެ ގުރޫޕާ އެއްވެސް ގުޅުމެއް އޮވެގެން ކުރި ކަމެއް ނޫން ކަމަށް ވެސް އެ ބަޔާނުގައިވެއެވެ.

އެ ގުރޫޕުން ރޭވިފައިވާ އެއްވެސް ދަތުރެއްގައި އެ ގުރޫޕަށް ނިސްބަތްވާ އެއްވެސް މެމްބަރެއްގެ ފަރާތުން އެފަދަ އަމަލެއް ދެން ނުފެންނާނެ ކަމަށް އެ ބަޔާނުގައިވެއެވެ.