ގްރޫޕުގެ ފަހު މެޗުގައި މިރޭ އިޓަލީ އަތުން ކްރޮއޭޝިއާ މޮޅުވަމުން ދަނިކޮށް، އިތުރު ވަގުތުގެ އަށް މިނެޓު ތެރޭގައި މަޓިއާ ޒަގާނީ ޖެހި ލަނޑުން ނަތީޖާ އެއްވަރުކޮށް އިޓަލީ މުބާރާތުގެ ދެވަނަ ބުރަށް ދަތުރުކޮށްފިއެވެ.

އެންމެ ފަހުގެ ޗެމްޕިއަން އިޓަލީ ޔޫރޯ ފުޓްބޯޅަ މުބާރާތުން ކަޓަކަޓައި އޮއްވައި، ކްރޮއޭޝިޔާ މުބާރާތުގެ ދެ ވަނަ ބުރަށް ދިއުމުގެ އުއްމީދު ފަނުފުލުން ދުއްވާލުމާއެކު ރެފްރީގެ ފަހު ކަށިގަނޑާއެކު ދެ ގައުމުގެ ކުޅުންތެރިން ވެސް ފެށީ ރޯށެވެ.

މި ނަތީޖާއާއެކު މުބާރާތުގެ ދެ ވަނަ ބުރުގައި އިޓަލީ ވާދަކުރަން ޖެހޭނީ ގްރޫޕް އޭގެ ދެވަނަ ހޯދި ސްވިޒަލޭންޑާ އެވެ.

Advertisement

ގްރޫޕުގެ ދެ ވަނަ ޓީމުގެ ގޮތުގައި އިޓަލީ ދެ ވަނަ ބުރަށް ދަތުރުކުރީ ހަތަރު ޕޮއިންޓާއެކުގަ އެވެ. ކްރޮއޭޝިޔާ އަށް ތިން މެޗުން ލިބުނީ ދެ ޕޮއިންޓެވެ. މި ގްރޫޕުގެ އެއްވަނަ ލިބުނީ ކުޅުނު ތިން މެޗުން ވެސް މޮޅުވި ސްޕޭނަށެވެ.

މި މެޗުގައި ކްރޮއޭޝިޔާގެ ހަމައެކަނި ލަނޑު ޖެހީ ކެޕްޓަން ލޫކާ މޮޑްރިޗެވެ. މި ލަނޑާއެކު އޭނާ ވެފައިވަނީ ޔޫރޯގެ ތާރީހުގައި ގޯލެއް ޖެހި އެންމެ ދުވަސްވީ ކުޅުންތެރިޔާ އަށެވެ.