ރާއްޖޭގެ ލެޖެންޑަރީ ފުޓްބޯޅަ ކުޅުންތެރިޔާ މުހައްމަދު އާރިފް (ބަކާ) ނިޔާ ވެއްޖެއެވެ.

އޭނާ އޭޑީކޭ ގައި އެޑްމިޓް ކުރީ ހައްޖުގެ އަޅުކަން ނިންމާލުމަށް ފަހު މާލެއަށް އައިތާ 3 ދުވަސްވީ އިރު، ހުން އައިސްގެން ހާލު ސީރިއަސްވެގެންނެވެ. އަދި އައިސީޔޫ ގައި ފަރުވާދެމުން ދަނިކޮށް ނިޔާވީ މިއަދުއެވެ.

ސ. ހިތަދޫއަށް އުފަން، އުމުރުން 38 އަހަރުގެ ބަކާ، ހައްޖުގެ އަޅުކަން ނިންމާލުމަށް ފަހު މާލެއަށް އައި ފަހުން ގަދައަށް ހުން އައިސް ބަލިވެ ގައިގެ ވަރު ދޫވާތީ އުޅުނު ކަމަށް އާއިލާ އާއ ހަވާލާދީ ބައެއް ނޫސްތަކުގައި ވަނީ ބުނެފައެވެ. އެއަށް ފަހު އޭނާ ހޮސްޕިޓަލަށް ގެންގޮސް ދެއްކި ކަމަށާއި އަދި ވެންޓިލޭޓަރުގައި ފަރުވާ ދިން ކަމަށް ވެސްބުނެއެވެ.

Advertisement

ބަކާ އަކީ ރާއްޖޭގެ ގައުމީ ޓީމުގައި ކުޅުނު ކުޅުންތެރިންގެ ތެރެއިން ހޮވާލެވޭ ކުޅުން ތެރިއެކެވެ. އެގޮތުން 2008 ގައި ބޭއްވި ސާފް ޗެމްޕިއަންޝިޕްގެ ތަށި ރާއްޖެ އަށް ހޯދައި ދިނުމުގައި އޭނާ މުހިންމު ދައުރެއް އަދާ ކުރިއެވެ.

މިޔަންމާގެ ލީގުގައި ވެސް މޮޅު ކުޅުމެއް ދައްކާފައިވާ ބަކާ އެއްވަނަ ޑިވިޒަންގައި އެންމެ ފަހުން ކުޅުނީ ޔުނައިޓެޑް ވިކްޓަރީ އަށެވެ. އަނިޔާ އާއި ފިޓްނަސްގެ މައްސަލަ ދިމާވެ، ޓޮޕް ޑިވިޒަނުގައި މިދިޔަ ދެ ސީޒަން އޭނާ ކުޅެފައެއް ނުވެ އެވެ. ނަމަވެސް އޭރު ބަކާ ބުނީ ކުޅުން ހުއްޓާ ނުލާ ކަމަށެވެ.