ޑެންމާކް ބަލިކޮށް، ޖަރުމަނުގައި ކުރިއަށްދާ ޔޫރޯ ފުޓްބޯޅަ މުބާރާތުގެ ކްއާޓާ ފައިނަލުން ޖަރުމަނު ޖާގަ ހޯދައިފި އެވެ.

ޖަރުމަނު ކްއާޓާ ފައިނަލްގެ ޖާގަ ހޯދީ ގަދަ 16 ޓީމް ވާދަކުރާ ބުރުގައި 2-0 ން ޑެންމާކް ބަލިކޮށްގެން ނެވެ. މެޗުގައި ޖަރުމަނުން ދެ ލަނޑުވެސް ޖެހީ ދެވަނަ ހާފްގައެވެ. ޖަރުމަނުން މެޗުގައި ލީޑް ނެގީ 53 ވަނަ މިނިޓްގައި ލިބުނު ޕެނަލްޓީ އަކުން ކައި ހާވާޓްޒް އެވެ. 67 ވަނަ މިނިޓްގައި ޖަރުމަނުގެ ދެވަނަ ލަނޑު ޖެހީ ޖަމާލް މުސިއާލާ އެވެ.

މެޗު ފަށައިގެން ރަނގަޅަށް ކުޅުނީ ޖަރުމަނުންނެވެ. ފުރަތަމަ ހާފްގެ ފަހު ވިއްސަކަށް މިނިޓަށް ވީފަހުން ޑެންމާކުން ގޭމްގެ ތެރެއަށް ވަދެ ކުޅެން ފެށިއެވެ. އެކަމަކު ހާފް ނިމެން ދިހަ މިނިޓަށް ވެފައި ވަނިކޮށް، ބޯވިއްސާރައާއެކު ވިދާ ގުގުރާ ސްޓޭޑިއަމް އަށް ގަނޑުފެން ފައިބަން ފެށުމުން ރެފްރީ މެޗު މެދުކަނޑާލި އެވެ. އަލުން ކުޅުން ފެށި 15 ވަރަކަށް މިނިޓް ފަހުންނެވެ.

Advertisement

ކްއާޓާ ފައިނަލްގައި ޖަރުމަނު ވާދަކުރަން ޖެހޭނީ ސްޕެއިންއާ ޖޯޖިޔާ ވާދަކޮށް މޮޅުވާ ޓީމަކާއެވެ.