އީރާނުގެ ރިޔާސީ އިންތިޚާބުގައި އެއްވެސް ކެންޑިޑޭޓަކަށް އިންތިޚާބު ކާމިޔާބު ކުރެވޭ މިންވަރަށް ފުރަތަމަ ބުރުގައި ވޯޓު ނުލިބުމުން އިންތިޚާބުގެ ދެވަނަ ބުރަކަށް ދާން ޖެހިއްޖެއެވެ.

ހޮނިހިރު ދުވަހުގެ މެންދުރުފަހު އީރާނުގެ ގައުމީ ޓީވީން އިންތިޚާބުގެ ނަތީޖާ އިއުލާން ކޮށްފައިވާއިރު، އީރާނުގެ އިންތިޚާބާ ބެހޭ އޮފީހުގެ ތަރުޖަމާނު މުހްސިން އިސްލާމީ ހާމަ ކުރި ގޮތުގައި 24.5 މިލިއަން މީހުން އިންތިޚާބުގައި ވޯޓު ލައިފައިވެއެވެ.

އިންތިޚާބުގައި އެންމެ ގިނަ ވޯޓު ލިބުނު ކުރީގެ ސިއްހަތާ ބެހޭ ވަޒީރު އަދި ގާނޫނު ހަދާ މަޖިލީހުގެ މެމްބަރު މަސްއޫދު ޕެޒެޝްކިއަން އަށް ލިބުނީ 10.4 މިލިއަން ވޯޓެވެ. އެއީ 42.45 އިން ސައްތަ އެވެ.

Advertisement

ދެވަނަ އަށް އެންމެ ގިނަ ވޯޓު ލިބުނީ އީރާނުގެ ކުރީގެ ނިކުލިރަ ކަންކަމާ ބެހޭ އިސް ނިގޯޝިއޭޓަރ ސައީދު ޖަލީލީ އަށެވެ. އޭނާ އަށް ލިބުނީ 9.4 މިލިއަން ވޯޓެވެ.

އީރާނުގެ އިންތިޚާބާ ބެހޭ ގާނޫނު ބުނާ ގޮތުން އިންތިޚާބު އެއްބުރުން ކާމިޔާބު ކުރުމަށް މަދުވެގެން 50 އިންސައްތައިގެ އިތުރަށް އެއް ވޯޓު ހޯދަން ޖެހެއެވެ.

ކުރިން ބެލެވިފައި އޮތް ގޮތާ ޚިލާފަށް ހުކުރު ދުވަހުގެ އިންތިޚާބުގައި މިހާރުގެ ގާނޫނު ހަދާ މަޖިލީހުގެ ރައީސް އަށާއި، ކުރީގެ ދާޚިލީ ވަޒީރަށް އެކަށީގެންވާ ކާމިޔާބެއް ލިބިފައެއް ނުވެއެވެ.

ފުރަތަމަ ބުރުގައި އެންމެ ގިނަ ވޯޓު ލިބުނު ދެ ފަރާތުން ވާދަ ކުރާ ދެވަނަ ބުރުގެ ވޯޓުލުން އޮންނާނީ ޖުލައި މަހުގެ 5 ވަނަ ދުވަހު ކަމަށް އީރާނުގެ އިންތިޚާބާ ބެހޭ އޮފީހުން ވަނީ ހާމަ ކޮށްފައެވެ.