ޔޫރޯ ފުޓްބޯޅަ މުބާރާތުގެ ކްއާޓާ ފައިނަލުން ސްޕެއިން ޖާގަ ހޯދައިފި އެވެ. ސްޕެއިން ކްއާޓާ ފައިނަލަށް ދަތުރުކުރީ 4-1 ން ޖޯޖިޔާ ބަލިކޮށްގެންނެވެ.

ނޮކްއައުޓް ބުރުގައި ޖޯޖިޔާގެ މައްޗަށް ސްޕެއިން ކުރި ހޯދީ، ޖޯޖިޔާއިން ފުރަތަމަ ލަނޑު ޖަހާ ކުރިހޯދާފައި ވަނިކޮށެވެ. މިލަނޑަކީ މެޗުގައި ޖޯޖިޔާއިން ސްޕެއިން ހާފްތެރެއަށް ނަގައިދިން ފުރަތަމަ ބޯޅަ ސްޕެއިން ޑިފެންޑަރ ލެ ނޯމަންޑް ގައިގަ ޖެހިފަ ބައިކޮޅަށް ވަން ލަނޑެކެވެ. 

ސްޕެއިން އަށް ނަތީޖާ ހަމަހަމަ ކޮށްދިނީ 38 ވަނަ މިނިޓްގައި މިޑްފީލްޑަރ ރޮޑްރީ އެވެ. 50 ވަނަ މިނިޓްގައި ސްޕެއިން އިން މެޗުގައި ލީޑް ނެގީ ފަބިއަން ރުއިޒް ޖެހި ލަނޑުންނެވެ. ސްޕެއިންގެ ތިންވަނަ ލަނޑު ޖެހީ ލަނޑު ޖަހަން ގިނަ ފުރުޞަތުތަކެއް ތަނަވަސްކޮށްދިން ނިކޯ ވިލިއަމްސް އެވެ. ސްޕެއިންގެ ހަތަރު ވަނަ ލަނޑު ބަދަލަކަށް ނިކުއިން އޮލްމޯ ޖެހީ 80 ވަނަ މިނިޓްގައެވެ.

Advertisement

ކްއާޓާ ފައިނަލްގައި ސްޕެއިން ވާދަކުރަން ޖެހޭނީ ޖަރުމަނާ އެވެ. ޖޯޖިޔާ ސްޕެއިން އަތުން ބަލިވެ ކެޓިޔަސް، އެމީހުން އެނބުރި ގައުމަށް ދާނީ އިސް އުފުލައިގެންނެވެ.