ޕެނަލްޓީގައި 3-0 ން ސްލޮވީނިޔާ ބަލިކޮށް، ޔޫރޯ ފުޓްބޯޅަ މުބާރާތުގެ ކްއާޓާ ފައިނަލުން ޕޯޗްގަލް ޖާގަ ޔަގީން ކޮށްފިއެވެ.

ޕޯޗްގަލް ކްއާޓާ ފައިނަލަށް ދަތުރުކުރީ މެޗުގެ 90 މިނިޓާއި، ނަތީޖާ ނެރުމަށް ކުޅުނު 15 މިނިޓްގެ ދެ ހާފްގައިވެސް ދެޓީމްކުރެ ޓީމަކަށް ލަނޑެއް ނުޖެހުމުން، ނަތީޖާ ނެރުމަށް ޖެހި ޕެނަލްޓީގައި ކުރި ހޯދައިގެންނެވެ. ޕެނަލްޓީގައި ސްލޮވީނިޔާއިން ޖެހި ތިން ޕެނަލްޓީ ވެސް ޕޯޗްގަލް ކީޕަރު ޑިއޯގޯ ކޮސްޓާ ވަނީ މަތަ ކޮށްފައެވެ.

ޕޯޗްގަލްއިން ޖެހި ތިން ޕެނަލްޓީ ވެސް ކާމިޔާބު ކުރިއެވެ. ނަތީޖާ ނެރުމަށް ކުޅުނު ފަނަރަ މިނިޓްގެ ދެހާފްގެ ތެރެއިން ފުރަތަމަ ހާފް ނިމެނިކޮށް ޕޯޗްގަލް އަށް ލިބުނު ޕެނަލްޓީ ކެޕްޓަން ރޮނަލްޑޯ އަތުން ނާކާމިޔާބު ވިޔަސް އޭނާ ވަނީ ޕެނަލްޓީ ޝޫޓް އައުޓްގައި އިސްނަގާ ޕޯޗްގަލްގެ ފުރަތަމަ ޕެނަލްޓީ ވަރަށް އިތުބާރާއެކީ ކާމިޔާބުކޮށްފައެވެ. ޕޯޗްގަލްގެ ދެވަނަ ދެވަނަ ޕެނަލްޓީ ކާމިޔާބުކުރީ ބުރޫނޯ ފެނާންޑޭޒް އެވެ. އަދި ތިންވަނަ ޕެނަލްޓީ ކާމިޔާބުކޮށް ކްއާޓާ ޔަގީންކޮށްދިނީ ބާނާޑޯ ސިލްވާ އެވެ.

Advertisement

ކްއާޓާ ފައިނަލްގައި ޕޯޗްގަލް ވާދަކުރަން ޖެހޭނީ ފްރާންސާއެވެ.