އިނގިރޭސިވިލާތުގެ އާންމު އިންތިޚާބުގައި ވޯޓުލުން މިއަދު ފެށިއްޖެއެވެ.

މި އިންތިޚާބުގައި ގާނޫނު ހަދާ މަޖިލީހުގެ ތިރީގެ ކަމަށްވާ ހައުސް އޮފް ކޮމަންސްއަށް 650 މެންބަރުން އިންތިޚާބު ކުރުމަށް އިނގިރޭސިވިލާތުގެ އެކި ކަންކޮޅުތަކުގައި އެތައް މިލިއަން ބަޔަކު ވޯޓުލަމުންދެއެވެ.

ވޯޓުލާ މަރުކަޒުތައް ހުޅުވާފައިވަނީ ލަންޑަން ގަޑިން ހެނދުނު 7:00 ގައެވެ. ބަންދުކުރާނީ ރޭގަނޑު 10 ޖަހާއިރުއެވެ.

Advertisement

މި އިންތިޚާބުގައި ކޮންމެ ދާއިރާއަކުން ވެސް އެއް މެންބަރަކު އިންތިޚާބު ކުރާނީ ފަސްޓް ޕާސްޓް ދަ ޕޯސްޓް ސިސްޓަމެއްގެ ތެރެއިންނެވެ. އެ ދާއިރާއިން އެންމެ ގިނަ ވޯޓު ލިބޭ ކެންޑިޑޭޓަކު އެ ގޮނޑި ކާމިޔާބު ކުރާނެއެވެ.

ވޯޓުލުން ނިމުމާއެކު އެގްޒިޓް ޕޯލްތަކުން އިންތިޚާބުގެ ނަތީޖާގެ އިބްތިދާއީ މަޢުލޫމާތު ދޭން ފަށާނެ ކަމަށް ބެލެވެއެވެ. މީގެ އިތުރުން ބައެއް ނަތީޖާތައް މިރޭގެ ކުރިން އިޢުލާނު ކުރެވިދާނެ ކަމަށް ބެލެވޭ އިރު، ހުކުރު ދުވަހުގެ ފަތިހުގެ ވަގުތުތަކުގައި ނަތީޖާގެ ބޮޑު ބައެއް އަންނާނެ ކަމަށް ބެލެވެއެވެ.

މިއިންތިހާބަކީ 2010 ވަނަ އަހަރުން ފެށިގެން ވެރިކަން ކުރަމުން އަންނަ ސެންޓަ ރައިޓް ކޮންޒަވޭޓިވްސް އަށް މިހާތަނަށް ކުރިމަތިވާ އެންމެ ބޮޑު ގޮންޖެހުމެވެ، ފަހުގެ ޕޯލްތަކުން ދައްކާ ގޮތުގައި އިދިކޮޅު ލޭބާ ޕާޓީއަށް 20 ޕޮއިންޓުގެ ބޮޑު ލީޑެއް ލިބިފައިވެއެވެ. އަދި ކަނާތު ފިޔައިގެ ރިފޯމް ޔޫކޭ ޕާޓީއަށް އޮތް ތާއީދު ވެސް އިތުރުވެފައިވެއެވެ.

މި އިންތިޚާބުގައި ޕާޓީތަކުގެ އަމާޒަކީ މަދުވެގެން 326 ގޮނޑި ކާމިޔާބުކޮށް އަޣުލަބިއްޔަތު ހޯދުމާއި ސަރުކާރެއް އެކުލަވާލުމަށް ރަސްގެފާނު ޗާލްސް ތިންވަނަގެ މެންޑޭޓް ހޯދުމެވެ. އެއްވެސް ޕާޓީއަކަށް އަޣުލަބިއްޔަތު ނުލިބިއްޖެ ނަމަ، ކޯލިޝަން ސަރުކާރެއް އެކުލަވާލަން ޖެހޭނެއެވެ.